بنیادی مسائل کی جانب توجہ مبذول کرانے کے لیے پیدل مارچ

شہریت ترمیمی قانون اور قومی شہری رجسٹر جیسے حسّاس امور پر ملک کی سیاست مرکوز ہوکر رہ گئی ہے لیکن اس کی آڑ میں بنیادی امور قومی دھارے سے دور ہوکر رہ گئے ہیں۔

ملک کے بنیادی مسائل کی طرف توجہ مبذول کروانے کے لیے بریلی میں ایم جے پی روہیل کھنڈ یونیورسٹی میں طلباء یونین کے سابق صدر نے شہر کے مختلف راستوں پر پیدل مارچ کیا۔

بریلی میں واقع ایم جے پی روہیلکھنڈ یونیورسٹی میں طلباء یونین کے سابق صدر شیو پرتاپ سنگھ یادو نے ملک کے بنیادی مسائل کی جانب توجہ مبذول کرانے کے مقصد سے پیدل مارچ نکالا۔

چونکہ ضلع میں دفعہ 144 نافذ ہے، لہذا طلباء کے گروپ کو ساتھ لیکر چلنے سے پرہیز کرتے ہوئے شیو پرتاپ سنگھ نے ہاتھوں میں ترنگا پرچم لے کر تنہا مارچ نکالا۔

تاہم یونین کے تمام طلباء اور کارکنان ان کے آس پاس بطور نگران کار چلتے رہے۔

شیو پرتاپ سنگھ کے ہاتھ میں ترنگا جھنڈا تھا اور اُنہوں نے مختلف نعرے لکھے ہوئے بینر کو اپنے بدن پر لٹکایا ہوا تھا جس پر بیروزگاری کا بڑھتا گراف، صحت محکمہ کے ناقص انتظامات، نامکمل ترقیاتی کام، بڑھتی افراط زر، گھٹتی ہوئی جی ڈی پی، تیل کی بڑھتی قیمتیں، بڑھتے ہوئے جرائم، سرمایہ داری کو فروغ، نجی شعبہ کو مسمار کرنے جیسے ضروری مسائل درج تھے۔

شیو پرتاپ سنگھ نے سب سے ڈاکٹر بھیم راؤ امبیڈکر، سردار ولبھ بھائی پٹیل اور بابائے قوم مہاتما گاندھی کے مجسمے پر گل پوشی کی۔

اس موقع پر اُنہوں نے کہا کہ 'مرکزی حکومت سی اے اے ، این آر سی اور فرقہ وارانہ امور پر توجہ دے رہی ہے تاکہ تمام بنیادی مسائل سے عوام کی توجہ کا رخ موڑا جا سکے۔