بریلی شہر کے کالی باڑی علاقے کے رہنے والے راجیش شرما کا 15 مربع گز میں اپنا آبائی مکان ہے، خستہ حال اور پرانا ہونے کی وجہ سے مکان کے کبھی بھی گرجانے کا خدشہ تھا۔
راجیش نے مکان کو نئے سرے سے تعمیر کرنے کے لیے بی ڈی اے (بریلی ڈولپمنٹ اتھارٹی) انتظامیہ سے پہلے اجازت طلب کی لیکن بی ڈی اے نے اس مکان کی تعمیر کی اجازت نہیں دی۔
راجیش نے جب مکان خود سے تعمیر کرانا شروع کیا تو بی ڈی اے کے ایک انجینیئر نے مکان کی تعمیر کو غیر قانونی بتاکر منہدم کرنے کی دھمکی دی اور کارروائی نہ کرنے کے عوض 20 ہزار روپئے رشوت کا مطالبہ کیا۔
لیکن جب راجیش نے محض 15 مربع گز میں اپنا مکان بنانا شروع کیا تب بھی بریلی ڈیویلپمنٹ اتھارٹی (بی ڈی اے)کے افسر نے مکان کی تعمیر کو غیر قانونی بتاکر اسے منہدم کرنے کی دھمکی دی۔
انجینیئر نے راجیش کے اہلخانہ سے مطالبہ کیا کہ اگر وہ اسے 20،000 روپئے دے دیں گے تو ان کا مکان منہدم نہیں کیا جائے گا۔
پریشان راجیش کو جب کہیں انصاف نہیں ملا تو وہ اپنے اہلخانہ کے ساتھ خود کشی کرنے ضلع کلیکٹریٹ پہنچ گیا۔اس نوجوان نے یہ قدم اس لیے اٹھایا ہے کہ وہ اب انتظامیہ سے مکمل طور پر تنگ آ چکا ہے۔
راجیش شرما پیشے سے ایک معمولی بڑھئی ہے، لہذا بیس ہزار روپئے کی رقم کا انتظام کرنا اس کے لیے مشکل تھا اسی وجہ سے وہ پریشان ہوکر اپنے اہلخانہ کے ساتھ ضلع کلیکٹریٹ پہنچ گیا۔ لیکن انتظامیہ نے اسے سمجھا بجھاکر اسے یہ قدم اٹھانے سے رک دیا۔
حالاںکہ راجیش کو اس کے اہلخانہ کے ساتھ خودکشی کرنے سے روکا گیا اور اس معاملے میں راجیش سے متعلق تمام دستاویز طلب کیے گئے۔
دراصل اس سے پہلے راجیش شرما نے اپنے سر پر چھت کا خواب دیکھا تھا اور اُس نے پی ایم آواس یوجنا (وزیراعظم رہائشی منصوبہ) کے تحت گھر حاصل کرنے کے لیے بھی بریلی میونسپل کارپوریشن بی ایم سی میں درخواست دی تھی۔ لیکن وہاں کسی نے اس کی درخواست پر غور نہیں کیا۔ راجیش اِس دفتر سے اُس دفتر کے چکّر لگاتا رہا لیکن سب لاحاصل رہا۔
اس سے قبل ایم سی کے کسی اہلکار نے پی ایم آواس یوجنا کے تحت گھر حاصل کرنے کے لیے راجیش سے ڈھائی لاکھ روپئے کا مطالبہ کیا تھا لیکن راجیش ڈھائی لاکھ روپئے ادا کرنے کا اہل نہیں تھا۔
اس وجہ سے راجیش نے پی ایم آواس حاصل کرنے کی تمام کوششوں کو مسترد کرتے ہوئے اپنے 15 مربع گز کے آبائی مکان پر ایک اور لنٹر ڈالنے کا فیصلہ کیا۔ راجیش کے بچے بڑے ہو گئے ہیں اور اسی مکان میں ان کی ماں بھی ساتھ رہتی ہے اور وہ بڑھئی کا کام بھی اسی چھوٹے سے مکان میں کرتا ہے۔
بہرحال بی ڈی اے کی نائب چیئرمین دیویا مِتّل نے اس معاملے میں یہ کہا ہے کہ راجیش بغیر نقشہ پاس کرائے ہی اپنا مکان تعمیر کروا رہا تھا اس لیے بی ڈی اے کی جانب سے اسے مکان منہدم کرنے کا نوٹس بھیجا گیا تھا۔
دیویا متل کا مزید کہنا ہے کہ' اگر کسی نے رشوت طلب کی ہے تو اس معاملے میں باریکی سے تحقیقات کی جائےگی۔ اگر الزام ثابت ہو جاتا ہے تو ہر صورت میں کارروائی کی جائے گی۔
