بارہ بنکی: پریشان مسافروں کی مدد کے لئے انتظامیہ اور پولیس مستعد

ریاست اترپردیش کے بارہ بنکی ضلع کے رام سنیہی گھاٹ کوتوالی حلقے میں گزشتہ رات ہوئے خوفناک سڑک حادثے کے زخمیوں اور پریشان افراد کی مدد کے لئے ضلعی انتظامیہ اور پولیس مکمل طور سے مستعد ہے۔ زخمیوں کے علاج کے بہتر انتظامات کے ساتھ ان کی دیگر ضروریات کا مکمل طور سے خیال رکھا جارہا ہے۔

گزشتہ رات تقریباً گیارہ بجے رام سنیہی گھاٹ کوتوالی حلقے میں شاہراہ پر واقع کلیانی ندی کے پل پر ایک تیز رفتار ٹرک نے کھڑی ہوئی بس کو پیچھے سے ٹکر ماردی تھی۔

جس کے نتیجے میں 18 افراد ہلاک اور 10 افراد زخمی ہوگئے تھے۔ اسی وقت سے پولیس اور انتظامیہ ریسکیو آپریشن میں لگا ہوا تھا۔

تاکہ 18 ہلاک افراد کا پوسٹ مارٹم جلد از جلد ہوسکے اس کے لئے ڈاکٹرس کی تین ٹیمیں لگائی گئی تھیں وہیں پنچنامے کے لئے کثیر تعداد میں پولیس اہلکاروں کوتعینات کیا گیا تھا۔ زخمیوں کے علاج کے بہتر انتظام کے ساتھ ان کے کھانے پینے اور دیگر ضروریات کا پورا خیال رکھا گیا۔

جو مسافر جانے کے خواہشمند تھے انہیں ان کی منزل تک پہنچا بھی دیا گیا۔ اس درمیان تعزیت پیش کرنے والوں کا سلسلہ بھی جاری رہا۔ سماجوادی پارٹی کی جانب سے سابق ریاستی وزیر اروند سنگھ گوپ نے پوسٹ مارٹم ہاؤس میں مہلوکین کے اہل خانہ سے ملاقات کی۔

بی جے پی کے ضلع صدر اور علاقائی ایم ایل اے بھی پوسٹ مارٹم ہاؤس پہونچے تھے۔ وہیں حکومت کے نمائندے کے طور پر وزیر انچارج دارا سنگھ چوہان نے یہاں پہونچ کر حالات کا جائزہ لیا اور پریشان افراد کو ہر قسم کی مدد کی یقین دہانی کروائی۔