ریاست اترپردیش کے ضلع بارہ بنکی میں اپنی بیان بازی کو لیکر ہمیشہ سرخیوں میں رہنے والے نواب گنج نگر پالیکا کے سابق چیئرمین رنجیت بہادر شریواستو کے مایاوتی اور بھارت رتن ڈاکٹر بھیم راؤ امبیڈکر پر کیے گئے نا زیبا تبصرے سے بہوجن سماج پارٹی کے کارکنان میں ابال آ گیا ہے۔
واضح رہے کہ نواب گنج نگر پالیکا کے سابق چیئرمین اور بی جے رہنما رنجیت بہادر شریواستو عرف لالا رنجیت نے کچھ روز قبل مایاوتی پر نا زیبا تبصرہ کیا تھا۔ انہوں نے کہا تھا کہ بی ایس پی سربراہ جاہل ہیں اور نقل کر کے ایل ایل بی پاس ہوئی ہیں۔ اسی لئے وہ لکھا ہوا بیان ہی پڑھتی ہیں۔
اس کے علاوہ انہوں بابا صاحب بھیم راؤ امبیڈکر کو برہمن بھی کہا تھا۔ ان کے ان دونوں بیانوں سے بی ایس پی کارکنان میں کافی ناراضگی ہے۔
سنیچر کے روز بھی بی ایس پی کارکنان نے لالا رنجیت کے خلاف تحریر دےکر ان کے خلاف ایف آئی آر کا مطالبہ کیا تھا۔ اب تک کارروائی نہ ہونے سے بی ایس پی کارکنان نے دوشنبہ کو پہلے ضلع مجسٹریٹ کے دفتر کے سامنے احتجاج کیا۔ اس کے بعد پولیس سپریٹینڈنٹ کو تحریر دےکر لالا رنجیت پر سخت کارروائی کا مطالبہ کیا۔
بی ایس پی کارکنان کا مطالبہ ہے کہ لالا رنجیت پر ایف آئی آر درج کر کے ان کی گرفتاری کی جائے ساتھ ہی ان پر درج تمام مقدمات میں ان کی ضمانت منسوخ کی جائے، کیونکہ لالا رنجیت سماج میں دنگا کرانے کی کوشش کر رہے ہیں۔
