ریاست اترپردیش میں ضلع بہرائچ کے موتی پور تھانے کے تحت ایک نابالغ بچے سے جنسی زیادتی کا معاملہ سامنے آیا ہے جہاں ایک 15 سال کے بچے نے 4 سال کے بچے کو امرود دینے کے بہانے کھیت میں بلایا جہاں اس نے اس کے ساتھ جنسی زیادتی کی جس سے بچہ بے ہوش ہو گیا۔
کافی وقت گزرنے کے بعد جب بچہ اپنے گھر نہیں پہنچا تو ماں و اہل خانہ پریشان ہو کر اس بچے کو تلاش کرنے لگے۔ تلاش کرتے کرتے متاثرہ کی ماں جب ایک کھیت میں پہنچی تو وہاں بچہ بے ہوشی کی حالت میں ملا۔ جسے فوراً علاج کے لئے ابتدائی صحت مرکز موتی پور میں داخل کرایا گیا۔
اس کی حالت تشویشناک دیکھ بچے کو بہرائچ میڈیکل کالج منتقل کردیا گیا۔ متاثرہ کے اہل خانہ نے موتی پور پولیس اسٹیشن میں انصاف کے لئے تحریری درخواست دی ہے۔
اس سلسلے میں پولیس کپتان بہرائچ وپن کمار مشرا کا کہنا ہے کہ معاملہ تھانہ موتی پور کے علاقے کا ہے جہاں 4 سالہ معصوم بچے کے ساتھ بدسلوکی گئی ہے اور ملزمان کے خلاف متعلقہ دفعات میں مقدمہ قائم کیا گیا ہے اور مزید قانونی کارروائی کی گئی ہے۔ اگر مزید تفتیش میں کوئی حقائق سامنے آتے ہیں تو آئین کے مطابق کارروائی کی جائے گی۔
