رامپور سے رکن پارلیمان اعظم خاں نے یہ کہا کہ 'اڈانی اور امبانی کے ہاتھوں بھارت کو گروی رکھ دینے سے نوجوانوں کو نوکریاں نہیں ملنے والی ہیں۔ انہوں نے کہا کہ ملک بدلے گا کیونکہ ملک بربادی کے دہانے پر کھڑا ہے'۔
رامپور میں جاری ضمنی انتخابی تشہری مہم کے دوران رکن پارلیمان اعظم خاں نے اپنی اہلیہ ڈاکٹر تزئین فاطمہ کی حمایت میں رامپور کے تاریخی عید گاہ کے گیٹ پر جلسہ عام کو خطاب کیا۔ انہوں نے اپنے خطاب میں مرکزی اور ریاستی حکومتوں کو اپنی سخت تنقیدوں کا نشانہ بنایا۔ انہوں نے نوجواں سے خطاب کرتے ہوئے کہا کہ 'نوجوانوں آپ اس ملک کے محافظ ہو۔ یہ ملک ضرور بدلے گا کیونکہ بھارت ابھی بربادی کے دہانے پر کھڑا ہے۔ موجودہ حکومت نے اس ملک کو بربادی کے دہانے پر لا کر کھڑا کر دیا ہے'۔
اعظم خان کی یوگی آدتیہ ناتھ پر نکتہ چینی
اعظم خاں نے کہا کہ 'بے روزگاری اپنے عروج پر ہے۔ لوگوں کو نوکریوں سے نکالا جا رہا ہے۔ ڈگریاں لے کر ملک کا نوجوان در در کی ٹھوکریں کھا رہا ہے اور مشورہ یہ ہے کہ پکوڑے بیچو، چائے بیچو۔ یہ تو سب کے ساتھ ظلم اور ناانصافی ہے'۔
