ریاست اترپردیش کے شہر علی گڑھ میں واقع علی گڑھ مسلم یونیورسٹی (اے ایم یو) کے راس مسعود اقامت گاہ (آر ایم ہال) کے گیٹ کے قریب 25 نومبر کی رات کو تقریباً ڈھائی بجے محمد رضوان پر حملہ کرنے والے دو لوگوں کو علی گڑھ پولیس نے گرفتار کیا ہے۔
واضح رہے کہ 25 نومبر کی رات کو محمد رضوان کے اوپر جان لیوا حملہ کیا گیا تھا، جس میں رضوان کے سینے پر گولی لگی تھی۔
رضوان کا علاج جواہر لعل نہرو میڈیکل کالج (جے این ایم سی) میں چل رہا ہے، جبکہ ڈاکٹرز کا کہنا ہے کہ رضوان اب مکمل طور پر خطرے سے باہر ہے۔
علیگڑھ ایس پی سی ٹی ابھیشیک نے بتایا 25 نومبر رات کو علیگڑھ مسلم یونیورسٹی کے آر ایم ہال کے گیٹ پر محمد رضوان پر فائرنگ کرنے والے حملہ آور شازی اور شبلو کو گرفتار کر لیا گیا ہے، شبلو نے طمنچے سے فائر کیا تھا۔
واضح رہے کہ جس طمنچے اور موٹر سائیکل کا استعمال کیا گیا تھا وہ بھی حملہ آوروں کے پاس سے برآمد کر لی گئی ہے۔
ایس پی (سٹی) ابھیشیک نے بتایا شبلو کے اوپر تقریباً دس مقدمے پہلے سے ہی چل رہے ہیں۔ شبلو تھانہ سول لائن اور تھانہ کوارسی کے علاقے جیون گڑھ کا رہنے والا بھی ہے، شازی تھانہ سول لائن کے علاقے سر سید نگر کا رہنے والا ہے۔
