رامپور کے بھارت گارڈن میں ایک پروقار تقریب کا انعقاد کر کے عالمی یوم خواتین کا اہتمام کیا گیا جہاں وزیر اعلیٰ یوگی آدتیہ ناتھ نے ویڈیو کانفرنسنگ کے ذریعہ خواتین سے خطاب کر کے یوم خواتین کی مبارکباد پیش کی اور خواتین کو بااختیار بنانے جیسے حکومت کی حصولیابیوں کا تذکرہ کرتے ہوئے بتایا کہ حکومت خواتین کے مسائل اور حقوق کے لئے کافی سنجیدہ ہے۔
اس موقع پر مختلف شعبوں سے منسلک خواتین نے بڑی تعداد میں شرکت کی۔ وہیں پروگرام میں موجود آنگن واڑی سے منسلک خواتین نے حکومت کو اپنی سخت تنقیدوں کا نشانہ بناتے ہوئے کہا کہ حکومت کی یوم خواتین تقریبات محض دکھاوا ہیں۔
آنگن واڑی خواتین نے حکومت پر جہاں خواتین کو خود کفیل بنانے کے نام پر بیروزگار کرنے کا الزام لگایا۔ وہیں انہوں نے کہا کہ مہنگائی ہر روز بڑھتی چلی جا رہی ہے جس سے گھر گرہستی چلانا مشکل ہوتا جا رہا ہے۔
وہیں کچھ خواتین نے الزام لگایا کہ سرکار آنگن واڑی خواتین سے کام تو بہت لے رہی ہے لیکن ان کو اس کی اتنی اجرت نہیں دی جا رہی ہے۔ ساتھ ہی انہوں نے یہ بھی کہا کہ یوم خواتین کی تقریب میں بھیڑ کے طور پر آنگن واڑی خواتین کا استعمال کیا جا رہا ہے۔
خواتین کا یہ بھی کہنا تھا کہ اگر موجودہ حکومت کا یہی رویہ رہا تو 2022 کے اسمبلی انتخابات میں وہ بی جے پی حکومت کو اپنے ووٹ کے ذریعہ بے دخل کر دیں گی۔
مزید پڑھیں:
'خواتین کی فلاح و بہبودی کے لیے حکومت کوشاں ہے'
بہرحال ان خواتین نے جس طرح سے اپنے ردعمل کا اظہار کیا ہے یہ کسی بھی جمہوری حکومت کے لئے اچھے اشارے نہیں ہیں۔ اس لئے اگر حکومت خواتین کے حقوق سے متعلق واقعی سنجیدہ ہے تو مہنگائی، بڑھتی بیروزگاری اور خواتین کے استحصال جیسے کئی اہم مسائل پر بھی پروگرام مرتب کرنا ہوگا۔
