بھارت بھوشن گپتا نے ای ٹی وی بھارت کے ساتھ بات کرتے ہوئے کانگریس و بی ایس پی کے مسلم امیدواروں پر الزام عائد کیا اور کہا کہ 'مذکورہ امیدواروں نے رکن پارلیمان اعظم خان کے ساتھ خفیہ سودے بازی کی جس کے سبب تزئین فاطمہ کو جیت حاصل ہوئی۔'
انہوں نے کہا کہ 'وہ اپنی شکست سے ناخوش نہیں ہیں بلکہ انہیں امید ہے کہ اگلے ضمنی انتخابات میں انہیں کامیابی حاصل ہوگی۔'
انہوں نے مزید کہا کہ 'میں نے انتخاب نہیں ہارا ہے، میدان ہارا ہے۔ جنگ تو ہم جیت لیں گے۔'
ان کا کہنا تھا کہ 'انہیں ہندو، مسلم، سکھ، عیسائی اور ہر طبقے کے لوگوں کے ووٹ ملے ہیں۔' انہوں نے لوگوں کی محبت جیتی ہے۔ ہندو مسلم ایکتا و گنگا جمنی تہذیب کی اس مثال کو ایسے ہی قائم رکھیں گے۔
رامپور اسمبلی حلقہ پر ملک بھر کے لوگوں کی نگاہیں تھیں۔ انتخابی میدان میں جہاں ایک طرف سماج وادی پارٹی کے قدآور رہنما اور ممبر پارلیمنٹ اعظم خان کی اہلیہ تزئین فاطمہ تھیں تو وہیں دوسری جانب حکمراں جماعت بی جے پی کے امیدوار بھارت بھوشن گپتا تھے۔
اس سخت ترین مقابلے میں تزئین فاطمہ اپنے شوہر اعظم خان کا قلعہ بچانے میں کامیاب ہوئیں تو وہیں برسراقتدار پارٹی کے امیدوار ہر ممکن کوشش کرنے کے باوجود کامیابی حاصل نہیں کر سکے۔
واضح رہے کہ رامپور میں انتخابی مہم کے دوران خود وزیراعلی یوگی آدتیہ ناتھ نے رامپور پہنچ کر عوام سے بی جے پی کے حق میں ووٹ کرنے کی اپیل کی تھی۔ اس کے علاوہ سابق رکن پارلیمان اور اداکارہ جیا پردا بھی کئی روز تک رامپور میں رہیں اور متعدد جلسے و ریلیز میں شرکت کرکے رائے دہندگان کو پارٹی کی جانب راغب کرنے کی کوشش کی۔'
اس سلسلے میں ای ٹی وی بھارت نے رامپور سے بی جے پی کے امیدوار بھارت بھوشن سے ملاقات کرکے شکست کی وجوہات کو جاننے کی کوشش کی۔
