علی گڑھ مسلم یونیورسٹی اپنے قیام کے سو سالہ جشن کے موقع پر ایک تاریخی کام کرنے جا رہی ہے، جس میں آئندہ برسوں کے لئے ایک ٹائم کیپسول زمین کے اندر دفن کیا جائے گا۔
اس ٹائم کیپسول کی خاصیت یہ ہے کہ یہ ہائی ٹیمپر اسٹیل سے بنایا گیا ہے جس کا وزن 1.5 ٹن سے بھی زیادہ ہے جس میں یونیورسٹی کی تاریخ اور اہم دستاویز رکھے جائیں گے۔
سرسید احمدخان نے آج سے تقریبا 144 سال قبل 8 جنوری 1877 کو محمڈن اینگلو اورینٹل کالج کی بنیاد رکھتے وقت کیپسول کی شکل میں ایک شئی یونیورسٹی میں دفن کی تھی جو آج بھی موجود ہے۔
علی گڑھ مسلم یونیورسٹی شعبہ رابطہ عامہ کے اسسٹنٹ ممبر انچارج اور ٹائم کیپسول مواد کے انچارج ڈاکٹر راحت ابرار نے خصوصی گفتگو میں بتایا کہ یونیورسٹی یوم جمہوریہ کے موقع پر ایک ٹائم کیپسول دفن کر رہی ہے۔
اے ایم یو کے 100 سال مکمل ہونے پر یہ فیصلہ لیا گیا تھا کہ ایک ٹائم کیپسول تیار کیا جائے اس کے بعد ایک کمیٹی بنائی گئی اور بڑی بحث کے بعد یہ طے پایا گیا کہ کیا کیا چیزیں اس میں رکھی جائیں۔
اس کیپسول کی خاص بات یہ ہے کہ یہ ہائی ٹیمپر اسٹیل سے تیار ہے اور اس کا وزن 1.5 ٹن سے زیادہ ہے اور اس میں گیس بھی ڈالی گئی ہے تاکہ جو دستاویزات رکھے جائیں وہ محفوظ رہیں۔ چھپے ہوئے دستاویزات کو ایسڈ فری (Acid Free) بھی کیا گیا ہے۔
گزشتہ برس 22 دسمبر کو وزیراعظم نریندر مودی نے صد سالہ تقریب کے موقع پر ایک خصوصی ڈاک ٹکٹ جاری کیا تھا وہ بھی اس ٹائم کیپسول میں شامل ہے۔
مزید پڑھیں: سرسید احمد خان کی صحافت اور اے ایم یو کا شعبہ ترسیل عامہ
یونیورسٹی کی تاریخ کے ساتھ اے ایم یو کے ہر کانووکیشن میں جن لوگوں نے خطاب کیا ہے وہ سب بھی اس میں محفوظ ہے۔ سرسید احمد خان کی مکمل سوانح حیات (بایوگرافی) کے ساتھ ایم اے او کالج کی تاریخ کو بھی محفوظ کیا گیا ہے۔
یہ ٹائم کیپسول 26 جنوری کو 11:00 بجے وکٹوریہ گیٹ کے سامنے دفن کیا جائے گا جس میں وائس چانسلر پروفیسر طارق منصور آن لائن پروگرام میں شرکت کریں گے۔
