معروف میگزین انڈیا ٹوڈے نے ممتاز بھارتی یونیورسٹیوں کی اپنے سالانہ سروے میں اے ایم یو کو تیسرے مقام پر جگہ دی ہے۔
واضح رہے کہ کچھ روز قبل ٹائمز ہائر ایجوکیشن، لندن کی رینکنگ میں اے ایم یو کو اعلیٰ مقام دیا گیا تھا تو حال ہی میں معروف میگزین انڈیا ٹوڈے نے ممتاز ہندوستانی یونیورسٹی کے اپنے سالانہ سروے 2020ء میں علی گڑھ مسلم یونیورسٹی کو تیسرے نمبر پر جگہ دی ہے۔
اس سروے میں ایک ہزار گورنمنٹ اور پرائیویٹ یونیورسٹیوں کو شامل کیا گیا ہے، دونوں میں اے ایم یو تیسرے مقام پر ہے اور اسے 2000 پوائنٹ میں سے 1718.6 پوائنٹ حاصل ہوئے ہیں۔
اس سروے کے اعتبار سے گزشتہ تین برسوں میں پیٹینٹ حاصل کرنے کے معاملے میں اے ایم یو عام گورنمنٹ یونیورسٹیوں میں چوتھی پوزیشن پر ہے۔ جہاں تک پوسٹ گریجویٹ کورس کی تعلیم و تدریس کا معاملہ ہے تو اے ایم یو تیسرے نمبر پر ہے جہاں مختلف موضوعات میں 90 پی جی کورسیز میں تعلیم ہوتی ہے۔
اسی طرح قانون کی تعلیم دینے والے کالج و اداروں کی رینکنگ میں اے ایم یو کی فیکلٹی آف لاء کو گیارھواں مقام دیا گیا ہے۔
اے ایم یو وائس چانسلر پروفیسر طارق منصور نے اس حصولیابی پر اساتذہ اور طلبہ کو مبارکباد پیش کی۔ وائس چانسلر نے اس بات پر اطمینان کا اظہار کیا کہ گزشتہ کئی مہینوں سے کووڈ-19 سے پیدا ہونے والے چیلینجز کے باوجود اے ایم یو بلندیوں کے سفر پر گامزن ہے۔ انہوں نے کہا کہ اس کامیابی نے پوری یونیورسٹی برادری کو مسرور کیا ہے اور یہ اساتذہ کی سنجیدگی اور ان کی محنت کی بدولت ہی ممکن ہو پایا ہے۔
