علیگڑھ: علی گڑھ مسلم یونیورسٹی میں داخلہ لینے کے خواہشمند طلبہ خاصی تعداد میں ہر سال یونیورسٹی میں داخلے امتحانات میں شامل ہونے آتے ہیں۔ ہر سال کی طرح رواں برس بھی اے ایم یو سمیت ملک کے دیگر مختلف مقامات پر داخلہ امتحانات منعقد کیا جا رہا ہے۔ اے ایم یو کے داخلہ امتحانات میں طلبہ کی تعداد سب سے زیادہ گیارہویں جماعت، ایم بی بی ایس اور بی ٹیک کے داخلے امتحان میں ہوتی ہے۔
تعلیمی سال 2023-24 کے لئے اے ایم یو میں گیارہویں جماعت (سائنس) وڈپلوما انجینئرنگ، گیارہویں جماعت (ہیومنٹیز اور کامرس) اور دینی مدارس کے فارغین کے لئے بِرِج کورس میں داخلے کے امتحانات علی گڑھ، لکھنؤ، میرٹھ، بریلی، پٹنہ، کولکاتہ، سری نگر، اور کشن گنج کے مراکز پر خوش اسلوبی کے ساتھ منعقد کئے گئے۔ یونیورسٹی کے کنٹرولر امتحانات ڈاکٹر مجیب اللہ زبیری نے بتایا کہ گیارہویں جماعت (سائنس) و ڈپلوما انجینئرنگ کے مشترکہ داخلہ امتحان کے لئے 33697 امیدواروں نے درخواستیں دی تھیں، جن میں سے 28558 امیدوار داخلہ امتحان میں شامل ہوئے۔
انھوں نے بتایا کہ گیارہویں جماعت (ہیومنٹیز اور کامرس) میں داخلے کے لئے 8021 امیدواروں نے، جب کہ بِرِج کورس کے لئے 249 امیدواروں نے داخلہ فارم پُر کئے ہیں۔ ڈاکٹر مجیب اللہ زبیری نے داخلہ امتحانات کے خوش اسلوبی سے انعقاد کے لئے اساتذہ اور دیگر ذمہ داران کا شکریہ ادا کیا۔ یونیورسٹی نے امتحانی مراکز پر اساتذہ کو مشاہد اور انچارج کے طور پر مقرر کیا تھا۔
یہ بھی پڑھیں: AMU Minority Character اے ایم یو 1920 ایکٹ اور اقلیتی کردار پر کوئی خطرہ نہیں: ڈاکٹر محمد شاہد
امیدواروں اور ان کے سرپرستوں کی رہنمائی اور مدد کے لئے یونیورسٹی کے این ایس ایس رضاکاروں اور اے ایم یو کے عملے کے اراکین نے یونیورسٹی میں مختلف مقامات پر خصوصی کیمپ لگائے تھے، جہاں پینے کے پانی کا بھی انتظام تھا۔ رضاکار تنظیموں کی طرف سے بھی امدادی کیمپ لگائے گئے تھے امیدواروں کے سرپرستوں نے یونیورسٹی کی طرف سے کئے گئے انتظامات کو سراہا۔
