کانگریس کی جنرل سکریٹری پرینکا گاندھی واڈرا نے لکھنؤ کے جی پی او پر واقع مہاتما گاندھی کے مجسمے پر تقریباً چالیس منٹ تک خاموش احتجاجی مظاہرہ کیا۔
اس موقع پر کانگریس کے سینئر رہنما پی ایل پُنیا نے ای ٹی وی بھارت سے خاص بات چیت کے دوران کہا کہ 'جب تک وزیر مملکت برائے امور داخلہ اجے مشرا اپنے عہدے سے استعفیٰ نہیں دیتے تب تک یہ جد و جہد جاری رہے گی۔
انہوں نے کہا کہ جس طرح سے لکھیم پور کھیری میں کسانوں کو گاڑی سے کچل کر ہلاک کیا گیا ہے اس سے ظاہر ہوتا ہے کہ حکومت کو کسانوں کی پرواہ نہیں ہے۔
پی ایل پُنیا نے کہا کہ اس معاملے کی ایس آئی ٹی جانچ ہوئی، گرفتاری بھی ہوئی جس سے واضح ہوتا ہے کہ مرکزی وزیر کا بیٹا اب تک جو بھی بیان دے رہا تھا کہ وہ موقع واردات پر نہیں تھے وہ بیان غلط تھا۔
بی جے پی کے ریاستی صدر ستندر دیو سنگھ کے بیان پر پی ایل پُنیا نے کہا کہ اگر بی جے پی کے ریاستی صدر کسانوں کی حمایت کرتے ہیں اور وہ یہ کہتے ہیں کہ گاڑی سے کچلنا نیتا گِری نہیں ہے تو ان کا ہم احترام کرتے ہیں۔
انہوں نے مزید کہا کی جب تمام ثبوت سامنے ہیں تو پھر کاروائی کرنے میں تاخیر کیوں ہو رہی ہے۔
پرینکا گاندھی کے متعدد مقامات پر جھاڑو لگانے کے حوالے سے پی ایل پُنیا نے کہا کہ 'پرینکا گاندھی کو حراست میں لینے کے بعد پولیس نے انہیں سیتا پور میں جس مہمان خانہ میں رکھا تھا وہاں گندگی تھی تو انہوں نے(پرینکا گاندھی) صاف کیا تھا لیکن جس طریقے سے اتر پردیش کے وزیراعلی یوگی ادیتہ ناتھ نے بیان دیا کہ وہ اسی لائق ہیں تو ان کا یہ بیان ان تمام خواتین اور طبقات کی توہین ہیں جو روزانہ جھاڑو لگاتی ہیں اور صاف صفائی کا کام کرتی ہیں۔
انہوں نے کہا کہ یہ جدوجہد اس وقت تک جاری رہی گی جب تک کہ وزیر مملکت برائے امور داخلہ اجے مشرا اپنے عہدے سے استعفیٰ نہیں دیتے۔
