صوبے میں تیسری لہر کے مدنظر پوری تیاری مکمل: ڈاکٹر مہندر سنگھ

اتر پردیش میں کورونا لہر کے درمیان ریاستی وزیر برائے جل شکتی مراد آباد پہنچے، جہاں انہوں نے پریس کانفرنس سے خطاب کرتے ہوئے کہا کہ کورونا کی تیسری لہر کے لئے اتر پردیش حکومت نے پوری تیاری کرلی ہے۔ ہمارے پاس آکسیجن کی کوئی قلت نہیں ہے۔

اترپردیش حکومت کے جل شکتی وزیر ڈاکٹر مہندر سنگھ مرادآباد پہنچے اور سرکٹ ہاؤس میں پریس کانفرنس کرتے ہوئے بتایا کہ کورونا وائرس بیماری کی تیسری لہر کے لیے اترپردیش حکومت نے پوری تیاری کی ہے۔

وزیر ڈاکٹر مہندر سنگھ نے کہا کہ مراد آباد میں 5 آکسیجن پلانٹ لگائے جارہے ہیں۔ بلیک فنگس بیماری کو وبائی بیماری قرار دیا گیا ہے۔ ریاست میں اب تک بلیک فنگس کے دو مریض ملے ہیں جنہیں میرٹھ ہسپتال ریفر کر دیا گیا ہے۔ جو بچے یتیم اور بے گھر ہوئے ہیں ان کی پڑھائی کا خرچہ اور کھانے پینے، رہنے کا خرچ سرکار اٹھائے گی۔ ساتھ ہی تین مہینے تک گیہوں چاول مفت مہیا کرا رہی ہے اور مزدوروں کو ایک ہزار روپے تین مہینے تک دیں گی۔ انہوں نے مزید کہا کہ ریاستی حکومت عوام کے لیے بہتر کام کر رہی ہے اور کورونا وائرس کی تیسری لہر کے لیے ہماری سرکار پوری طرح سے تیار ہے۔ نئے ہسپتال کھول کر ہسپتالوں میں بیڈ کی تعداد بڑھائی جا رہی ہے اور سبھی کو دوائیاں، آکسیجن اور بیڈ وقت پر دستیاب کرایا جائے گا۔