علی گڑھ (اتر پردیش) : چاند پر چندریان 3 کی سافٹ لینڈنگ کو انڈین اسپیس ریسرچ آرگنائزیشن (اسرو) نے ٹیلی ویژن اور انٹرنیٹ میڈیا کے ذریعے براہ راست نشر کیا تھا، جس کو ملک کے مختلف مقامات سمیت علی گڑھ مسلم یونیورسٹی (اے ایم یو) میں بھی مختلف مقامات پر طلباء، اساتذہ اور غیر تدریسی عملہ نے اس تاریخی لمحہ کا مشاہدہ کیا اور خوشی کا اظہار کیا۔
اے ایم یو کے کارگزار وائس چانسلر پروفیسر محمد گلریز نے وزیر اعظم نریندر مودی کی قیادت میں ملک کی اس عظیم کامیابی پر فخر و مسرت کا اظہار کرتے ہوئے کہا کہ کہ یہ اسرو کی اب تک کی سب سے عظیم کامیابی ہے، جس نے ہندوستان کے لیے چاند کے جنوبی حصے پر اترنے والا پہلا اسپیس کرافٹ لانچ کرنا ممکن بنایا۔انہوں نے کہا: ’’بھارت نے چندریان3 مشن کو ممکن بنانے کے لیے اپنی مقامی تکنیکی صلاحیت پر مکمل انحصار کیا اور یہ یقیناً ہمارے لیے اپنے سائنسدانوں پر فخر کرنے کا لمحہ ہے جنہوں نے اس خواب کو حقیقت میں بدلنے کے لیے انتھک جدو جہد کی۔‘‘
یونیورسٹی کے انتظامیہ بلاک میں اے ایم یو رجسٹرار، محمد عمران آئی پی ایس، اور دیگر اہلکار چندریان-3 کے چاند پر اترنے کے تاریخی لمحہ کا مشاہدہ کرنے کے لیے موجود تھے۔ اے ایم یو میں مختلف مقامات پر چندریان-3 کی تاریخی لینڈنگ کو لائیو دیکھنے کا اہتمام کیا گیا تھا۔ طلباء و طالبات نے اس تاریخی لمحہ کو حیرت و مسرت سے دیکھا اور خوشی کا اظہار کیا۔
مزید پڑھیں: LG Sinha on Chandrayaan 3 Landing: 'چندریان 3کی کامیابی پوری انسانیت کے لیے فخر کا لمحہ'
یاد رہے کہ بھارت کی جانب سے روانہ کیے جانے والے چندریان 3 نے کامیابی سے چاند کی سطح پر گزشتہ شام تقریباً چھ بجے جنوبی حصے پر لینڈنگ کی تھی۔ بھارت، چاند کے اس حصے پر خلائی جہاز اتارنے والا پہلا جبکہ امریکہ، سابق سوویت یونین اور چین کے بعد چاند پر مجموعی طور سافٹ لینڈنگ کرنے والا چوتھا ملک بن گیا ہے۔ بھارت کے خلائی ایجنسی اسرو نے کامیاب لینڈنگ کے بعد اپنے ہیڈکوارٹر کے آپریشن سینٹر کی تصاویر بھی شیئر کیں تھی جہاں سائنسدان اور ٹیکنیکل اسٹاف کامیاب لینڈنگ پر خوشی کا اظہار کرتے نظر آ رہے تھے۔
یہ بھی پڑھیں: چندریان 3 کی لانچنگ ہندوستانیوں کے لئے تاریخی اور قابل فخر لمحہ
