Case File Against Tractor Driver: روڈ شو میں ٹریکٹر ڈرائیورسمیت ریلی منتظم کے خلاف مقدمہ درج

ضلع علی گڑھ میں گزشتہ روزسابق وزیراعلیٰ اکھلیش یادو کے روڈ شو میں شامل ٹریکٹر کے ڈرائیورسمیت ریلی کے منتظم کے خلاف پولیس نے سول لائن تھانے میں مقدمہ درج کیا ہے۔

ریاست اترپردیش کے ضلع علی گڑھ میں گزشتہ روز سماج وادی پارٹی کے قومی صدر سابق وزیر اعلی اکھلیش یادو نے اپنے پارٹی کے میئر امیدوار حاجی ضمیر اللہ کی حمایت میں جمالپور علاقے میں ایک روڈ شو میں حصہ لیا تھا، جس میں ایک ٹریکٹر نما جے سی بی پر ایک درجن سے زائد کارکنان سوار تھے۔ جو سوشل میڈیا پر بھی وائرل ہوا تھا ان کے خلاف آج تھانہ سول لائن میں ٹریکٹر کے ڈرائیور سمیت ریلی کے منتظم کے خلاف ٹریفک ایکٹ کے تحت مقدمہ درج کیا گیا۔

روڈ شو مشکل سے ایک کلومیٹر کا تھا جو جمال پور سے شروع ہو کر علی گڑھ مسلم یونیورسٹی کے سینیٹری گیٹ پر اختتام ہوا۔ روڈ شو میں سماج وادی پارٹی کے کارکنان موٹر سائیکل، کار، پیدل اور ایک ٹریکٹر نما جے سی بی پر تقریبا ایک درجن افراد سوار تھے، جس سے ایک بڑا حادثہ بھی پیش آسکتا تھا۔ٹریکٹر ڈرائیور اور ریلی منتظم کے خلاف درج مقدمہ سے متعلق سرکل افسر (سی او) اشوک کمار سنگھ نے بتایا کہ تھانہ سول لائن کے جمال پور میں سابق وزیر اعلیٰ اکھلیش یادو کا روڈ شو منعقد کیا گیا تھا، جس میں جے سی بی نما ٹریکٹر کا استعمال کیا گیا تھا، اس دوران لوگوں کو اس کے اوپر بٹھایا گیا۔ ویڈیو سے معلوم ہوتا ہے کہ ٹریکٹر خطرناک انداز میں چلایا گیا تھا جس سے لوگوں کی جانوں کو خطرہ ہوسکتا تھا۔

ضابطہ اخلاق کی خلاف ورزی کی گئی اور لوگوں کی جان کو خطرے میں ڈالنے کے تناظر میں مقدمہ درج کیا گیا ہے۔ ٹریکٹر ڈرائیور اور ریلی آرگنائزر کے خلاف مناسب دفعات کے تحت مقدمہ درج کیا گیا ہے۔

واضح رہے بلدیاتی انتخابات میں ضلع علی گڑھ سے سماجوادی پارٹی کے میئر امیدوار سابق رکن اسمبلی حاجی ضمیر اللہ اور کونسلر کے لئے تقریبا 67 امیدوار میدان میں ہیں ،جن کی حمایت میں روڈ شو کرنے اکھلیش یادو گزشتہ روز آئے تھے۔