Kushinagar Fire Incident کشی نگر میں آگ لگنے سے ایک ہی خاندان کے پانچ بچوں سمیت چھ لوگوں کی موت

کشی نگر میں آگ لگنے سے چھ لوگوں کی موت ہو گئی۔ اس آتشزدگی میں ایک خاتون اور پانچ بچے زندہ جل گئے۔ آگ لگنے کی وجہ تاحال معلوم نہیں ہو سکی۔

کشی نگر: اترپردیش کے کشی نگر سے جمعرات کو انتہائی افسوسناک خبر سامنے آئی ہے۔ یہاں ایک گھر میں پراسرار حالت میں آگ لگ گئی جس میں ایک ہی خاندان کے چھ افراد زندہ جل گئے۔ مقامی لوگوں کے مطابق مرنے والوں میں ایک خاتون اور پانچ بچے شامل ہیں۔ یہ آگ آدھی رات کو لگی، جس کے بعد علاقے میں کہرام مچ گیا۔

پولیس کے مطابق یہ آگ رامکولہ تھانہ کے اردھا باپو نگر میں لگی۔ بتایا جا رہا ہے کہ آگ لگنے کے وقت پورا خاندان گھر میں سو رہا تھا۔ آگ نامعلوم وجوہات کی بنا پر لگی۔ پورا خاندان آگ کی زد میں آگیا۔ آتشزدگی کی اطلاع ملتے ہی مقامی لوگوں نے آگ بجھانے کی کوشش کی تاہم خاتون اور پانچ بچے زندہ جل گئے۔ پورا خاندان آگ میں پھنس گیا تھا جس کی وجہ سے کسی کو بچایا نہیں جا سکا۔ پورا خاندان کچھ ہی دیر میں تباہ ہو گیا۔ واقعہ کی اطلاع ملتے ہی انتظامیہ کے اہلکار موقعے پر پہنچ گئے۔

ایس پی دھول جیسوال نے بتایا کہ آگ لگتے ہی گاؤں کے لوگ جمع ہوگئے۔ لوگوں نے آگ بجھانے کی کوشش کی لیکن تب تک چھ افراد کی موت ہو چکی تھی۔ واقعہ کی اطلاع ملتے ہی پولیس اور فائر بریگیڈ کی ٹیم نے موقع پر پہنچ کر آگ پر قابو پایا۔ سبزی تاجر نیمی کی بیوی سنگیتا (38 سال)، بیٹیاں انکیتا (10 سال)، لکشمی (9 سال)، ریتا (3 سال)، گیتا (2 سال) اور بابو (1 سال) آگ میں جھلس کر ہلاک ہوگئیں۔ لاشوں کو پوسٹ مارٹم کے لیے بھیج دیا گیا ہے۔ ایس ڈی ایم کپتن گنج کے ساتھ ریونیو اور پولیس ٹیم مزید کارروائی میں مصروف ہے۔