ٹرک پلٹنے سے ایک ہی گھر کے چار افراد ہلاک

اترپردیش کے ضلع قنوج کے گوروسهائے گنج علاقے میں ٹائر پھٹنے سے لہسن بردار ٹرک سڑک کنارے جھونپڑی پر پلٹ گیا، جس سے وہاں سو رہے ایک ہی کنبے کے چار افراد ہلاک اور تین زخمی ہو گئے۔

پولیس کے ترجمان نے اطلاع دی کہ رات تقریبا پونے دو بجے مین پوری کی طرف سے لہسن بردارٹرک کانپور کی جانب جا رہا تھا۔جی ٹی روڑ پر سرائے پریاگ میں ٹرک کا ٹائر پھٹ گیا، جس سے وہ بے قابو ہوکر سڑک کنارے سونےلال کی جھونپڑي پر پلٹ گیا۔

حادثے میں 40 سالہ سونےلال کے علاوہ اس کی اہلیہ 38 سالہ گڑیا، 10 برس کا بھتیجے ساحل اور 8 برس کے ٹھگوا کی موقع پر ہی موت ہو گئی جبکہ تین افراد زخمی ہو گئے۔ زخمیوں کو ترروا میڈیکل کالج میں داخل کرا دیا گیا ہے۔

انہوں نے بتایا کہ اطلاع ملنے کے بعد پولیس موقع پر پہنچی اور کرین کی مدد سے پلٹے ٹرک کو اٹھایا اور اس کے نیچے دبی دو لاشوں کو نکالا گیا۔

حادثے کی وجہ سے کافی دیر تک گاڑیوی کی آمدو رفت متاثر رہی۔ انہوں نے بتایا کہ غریب سونےلال نے ٹین وغیرہ سے جھونپڑی بنا رکھی تھی اور اپنے کنبے کے ساتھ رہتا تھا۔