جموں و کشمیر کے ضلع ادھمپور میں محکمہ پبلک ورکس ڈپاٹمنٹ کے عارضی ملازمین نے اپنی کام چھوڑو ہڑتال میں 72 گھنٹے کی توسیع کر دی ہے۔ یہ ملازمین محکمہ میں گزشتہ 20 سے 25 سالوں سے مسلسل کام کر رہے ہیں۔ اس دوران عارضی ملازمین نے زبردست احتجاج کیا اور انتظامیہ سے مطالبہ کیا ہے کہ ان کی بقایہ اجرت انہیں جاری کی جائے اور انہیں باقاعدگی سے تنخواہ دی جائے۔ عارضی ملازمین نے مطالبہ کیا کہ انہیں ترجیحات کی بنیاد پر مستقل کر دیا جائے۔
اس موقع پر محکمہ میں عارضی ملازم کلدیپ کمار شرما نے کہا کہ یہ ہڑتال کیجول لیبر متحدہ محاذ کے بینر تلے کی جارہی ہے۔ انہوں نے کہا کہ انتظامیہ کی جانب سے گذشتہ 3 روز سے کوئی یقین دہانی نہیں کرائی گئی ہے جس کی وجہ سے ان کی جانب سے ہڑتال کی مدت میں توسیع کر دی گئی ہے۔
انہوں نے مطالبہ کیا کہ ترجیحات کی بنیاد پر انہیں تنخواہ کے بقایاجات دیے جائیں اور باقاعدہ تنخواہ بنائی جائے اور پالیسی طے کی جائے تاکہ وہ بھی اپنے کنبہ کی دیکھ بھال کرسکیں۔
