عام لوگوں سے لے کر بالی وڈ اسٹار، صنعت کار، کھلاڑی کوویڈ 19 سے جنگ کے لئے وزیر اعظم راحتی فنڈ میں عطیہ کررہے ہیں۔
اس سلسلے میں جموں و کشمیر کے ضلع اودھمپور میں 4 اسکولی طلبہ نے اپنی بچت وزیر اعظم راحتی فنڈ میں عطیہ کی ہے۔
15 سالہ آبھاس شرما، 10 سالہ آرادھیا شرما، 9 سالہ اگرم دت اور 8 سالہ ادھوک دت ہفتے کے روز اودھمپور کے ایس ایس پی راجیو پانڈے کے دفتر پہنچے اور انہیں اپنی بچت سونپی۔
اس دوران اودھمپور کے ایس ایس پی راجیو پانڈے نے بچوں کے اس تعاون کی تعریف کی اور اسے قبول کیا۔ ایس ایس پی نے کہا کہ یہ بچے تعریف کے مستحق ہیں۔
انہوں نے اپنی پاکٹ منی سے عطیہ کیا ہے۔ ان میں سے ایک نے 575 روپئے جبکہ دوسرے نے 1100 روپے دیاہے۔ یہ رقم چھوٹی ہوسکتی ہے لیکن یہ کارنامہ یقینی طور پر لوگوں کو عطیہ کرنے کے لئے متاثر کرے گا۔
اس دوران چاروں بچوں نے کہا کہ یہ وقت سب لوگوں کو ساتھ آکر غریبوں کی مدد کرنے کا ہے۔
بچوں میں سے ایک آبھاس شرما نے کہا کہ کورونا وائرس پورے ملک میں پھیل گیا ہے۔ بہت سارے لوگ اپنی زندگی سے ہاتھ دھو بیٹھے ہیں۔ ہم غریبوں کی مدد کرنا چاہتے ہیں۔ اسی لئے ہم نے رقم چندہ کردی ہے۔ ہم سب کو کورونا وائرس کے پھیلاؤ کو روکنے کے لئے اپنا کردارادا کرنا ہوگا۔
