اودھم پور: ضلع کے مختلف حصوں سے آشا ورکرز شہید بھگت سنگھ پارک میں جمع ہوئیں۔ محکمہ صحت میں کام کرنے والی آشا ورکرز کے ساتھ امتیازی سلوک کی وجہ سے مختلف مطالبات کئے اور اس سلسلے میں زوردار نعرے بازی کی۔ اس موقع پر مختلف علاقوں سے تعلق رکھنے والی آشا ورکرز نے کہا کہ ہر جگہ پر ہمارا استعمال کیا جاتا ہے، جب کہ ہمیں تنخواہ کے نام پر اکاؤنٹ میں ایک ہزار سے دو ہزار روپے دیے جاتے ہیں اور وہ بھی کبھی دو ماہ کے لیے، تو کبھی تین ماہ کے لیے ہمارے کھاتوں میں پیسے ڈال دیا جاتا ہے۔
مظاہرین نے مزید کہا کہ آج تک سمجھ میں نہیں آیا کہ یہ رقم ہمیں کیسے دی گئی۔ دوسری جانب مظاہرے میں شامل آشا ورکر ریتا دیوی نے بتایا کہ کسی بھی محکمے میں کوئی کام آتا ہے تو افسران اسے آشا ورکر کے حوالے کر دیتے ہیں اور جب تک آشا ورکر رپورٹ نہیں دیتی ان کا کام مکمل نہیں ہوتا۔ ہم لوگ کام کرتے ہیں لیکن کام کے نام پر کبھی 200 تو کبھی 300 روپیے دیے جاتے ہیں، وہ بھی وقت سے نہیں ملتے جس کی وجہ سے ہمیں مالی پریشانیوں کا سامنا کرنا پڑتا ہے۔
آشا ورکرز نے مطالبہ کرتے ہوئے کہا کہ ہماری ماہانہ 26000 روپے تنخواہ مقرر کی جائے، تاکہ ہم دل سے کام کریں اور اپنے اہل خانہ کا صحیح طریقے سے خیال رکھ سکیں۔ مظاہرین نے مزید کہا کہ جب تک ہمارے مطالبات تسلیم نہیں کیے جاتے ہڑتال جاری رہے گی۔
