حیدرآباد: معشوقہ کی دوسرے نوجوان سے شادی کی تصویروں کو دیکھ کر ایک نوجوان نے صدمہ کے عالم میں خودکشی کرلی۔ اس نوجوان کی جیب سے منگل سوتر ملا جو وہ اس لڑکی کو پہنانا چاہتا تھا۔ یہ واقعہ شہر حیدرآباد کے حیات نگر پولیس اسٹیشن کے حدود میں پیش آیا۔ تفصیلات کے مطابق پانڈو لکشمیا اور اننتما اپنے تین بیٹوں کے ساتھ رنگاریڈی ضلع کی ونائک نگر کالونی میں رہتے ہیں۔ ان کا دوسرا بیٹا 23 سالہ گنیش لاری ڈرائیور ہے۔ وہ ایک سال سے مقامی لڑکی سے محبت کرتا تھا اور اس سے شادی کرنا چاہتا تھا تاہم لڑکی کے والدین نے حال ہی میں دوسرے نوجوان سے شادی کردی۔ اس نے شادی کی تصاویر گنیش کو واٹس ایپ پر بھیجیں۔
یہ بھی پڑھیں: Suicide in Telangana نظام آباد میں میڈیکل طالب علم کی خودکشی
ان تصویروں کو دیکھ کر وہ صدمہ سے دو چار ہو گیا اور اسی مایوسی و صدمہ کے عالم میں اس نے درخت سے پھانسی لے کر خودکشی کرلی۔ مقامی لوگوں نے منگنور کے مضافات میں ایک درخت سے اسے لٹکا ہوا پایا اور پولیس کو اطلاع دی۔ اس کی جیب میں منگل سوتر بھی ملا۔ پولیس نے مقدمہ درج کرکے جانچ شروع کر دی ہے۔ واضح رہے کہ کچھ روز پہلے سکندرآباد کے گاندھی ہاسپٹل میں ایک 23 سالہ نوجوان نے خودکشی کرلی۔ پولیس کے مطابق میٹو گوڈا کا ساکن سائی اسپتال میں زیر علاج تھا اور اس نے رات میں اسپتال کی 7ویں منزل پر جاکر پھانسی لگا لی۔ اطلاع ملنے پر پولیس نے موقع پر پہنچ کر لاش کو پوسٹ مارٹم کے لیے بھیج دیا۔
یو این آئی
