مرکزی مملکتی وزیر داخلہ جی کشن ریڈی نے اپنی اہلیہ کے ساتھ پولنگ اسٹیشن پہنچ کر ووٹ دیا۔ کشن ریڈی نے ووٹ ڈالنے کے بعد پولنگ بوتھ کے باہر میڈیا سے بات کرتے ہوئے تمام حیدرآباد کے عوام سے حق رائے دہی میں حصہ لینے کی اپیل کی۔ انہوں نے بہتر مستقبل کے لیے ووٹ دینے کی خواہش کی۔
تلنگانہ کے وزیر بلدی نظم و نسق کے تارک راما راو نے آج اپنے حق رائے دہی کا استعمال کیا۔ انہوں نے اپنے حلقہ کے پولنگ بوتھ پہنچ کر ووٹ دیا۔ صبح 7 بجے پولنگ کا آغاز ہوا جبکہ کے ٹی آر نے ابتدائی اوقات میں ہی اپنے حق رائے دہی کا استعمال کیا۔
حیدرآباد کے شاستری پورم میں واقع پولنگ بوتھ پر مجلس اتحاد المسلمین کے صدر اسدالدین اویسی نے ووٹ دیا۔ وہ 7 بجے سے قبل ہی پولنگ بوتھ پہنچ گئے تھے۔ تاہم سات بجے کے فوراً بعد انہوں نے حق رائے دہی کا استعمال کیا۔
سابق مرکزی وزیر اور نامور تلگو اداکار چرنجیوی نے بھی جوبلی ہلز کلب میں واقع پولنگ بوتھ پہنچ کر ووٹ دیا۔ انہوں نے ووٹ دینے کے بعد پولنگ اسٹیشن کے باہر ووٹ کا نشانہ بتایا۔
چیف سکریٹری سومیش کمار نے اپنے خاندان کے ہمراہ عطاپور میں واقع پولنگ بوتھ پہنچ کر حق رائے دہی سے استفادہ کیا۔
تلنگانہ ہائی کورٹ کے چیف جسٹس آر ایس چوہان نے کندن باغ کے پولنگ اسٹیشن پہنچ کر ووٹ دیا۔
ڈپٹی میئر گریٹر حیدرآباد میونسپل کارپوریشن بابا فصیح الدین نے بورا بنڈہ ڈویژن میں اپنے حق رائے دہی کا استعمال کیا۔
سائبرآباد کے پولیس کمشنر بی سی سجنار نے بھی اپنے ووٹ کا استعمال کیا اور رائے دہی میں حصہ لیا۔
حیدرآباد پولیس کمشنر انجنی کمار نے امبرپیٹ انڈور اسٹیڈیم میں واقع پولنگ بوتھ پہنچ کر حق رائے دہی کا استعمال کیا اور لوگوں کو بلاخوف اپنے ووٹ استعمال کرنے کا مشورہ دیا۔
