گریٹر حیدرآباد میونسپل کارپوریشن کے انتخابات کے نتائج میں ٹی آر ایس اور ایم آئی ایم کو زیادہ سیٹ ملنے کے رجحان کے بعد حیدرآباد میں واقع تلنگانہ بھون اور دارالسلام میں بڑی تعداد میں کارکنان جمع ہوئے اور جشن منانا شروع کیا۔
اس موقع پرٹی آر ایس اور ایم آئی ایم کے کارکنان نعرے بازی کرتے ہوئے اور ناچتے ہوئے دیکھا گیا۔ دونوں پارٹی دفاتر پر آتش بازی بھی کی گئی اور کارکن ایک دوسرے کو میٹھائی کھلارہے تھے۔
ٹی آر ایس کے اعلیٰ قائدین نے تمام پارٹی کارکنوں کو مبارکباد پیش کی اور ووٹرز کا شکریہ ادا کیا اسی طرح مجلس کے صدر اسدالدین اویسی نے بھی پارٹی کارکنوں کو مبارکباد دی اور عوام کا شکریہ ادا کیا۔
واضح رہے کہ ٹی آر ایس کو 2016 کے مقابلہ میں کم نشستیں حاصل ہوئی ہیں تاہم جی ایچ ایم سی انتخابات میں پارٹی کو سب سے زیادہ حلقوں پر کامیابی حاصل کرنے کا موقف حاصل ہوا ہے۔ وہیں مجلس اتحاد المسلمین نے اپنا سابقہ ریکارڈ برقرار رکھا ہے جبکہ اسے گذشتہ انتخابات کی بہ نسبت کچھ کم سیٹوں پر کامیابی حاصل ہوئی ہے۔
