اس سلسلہ میں ان مشتبہ مریضوں کے خون کے نمونوں کی جانچ کی گئی۔پہلے ہی گاندھی اسپتال میں ایک مریض زیرعلاج ہے جوکرونا وائرس سے مثبت پایاگیا۔اس کو علحدہ وارڈ میں رکھتے ہوئے علاج کیاجارہا ہے۔
تلنگانہ کے وزیر صحت ای راجندر نے کہا ہے کہ کرونا وائرس کے علاج کے لئے خصوصی اسپتال قائم کیاجائے گا۔انہوں نے میڈیا سے بات کرتے ہوئے کہا ”ہم نے محکمہ کے سلسلہ میں کئی اہم فیصلے کئے ہیں۔محکمہ نے کرونا وائرس کے علاج کے لئے خصوصی اسپتال قائم کرنے کا فیصلہ کیا ہے“۔انہوں نے کہاکہ 9مختلف محکمہ جات تال میل کے ساتھ کام کررہے ہیں اور ہر ایک محکمہ میں ایک نوڈل آفیسر کام کررہا ہے۔
وزیرصحت نے کہا کہ حیدرآباد میں آرمی اسپتال میں 300بستروں کے علحدہ وارڈس کی سہولت ہے۔وقارآباد کے چیسٹ اسپتال اور ایرگڈہ کے چیسٹ اسپتال میں علحدہ وارڈس کے قیام پر غور کیاجارہا ہے۔
انہوں نے کہاکہ امراض شش کے ماہرین اور نرسس کی تقرری اس وائرس کے علاج کے لئے کی گئی ہے۔ریاستی محکمہ صحت نے پرائیویٹ اسپتالوں کو بھی چوکس کیا ہے۔
وزیرموصوف نے پرائیویٹ اسپتالوں میں کرونا وائرس کے مشتبہ مریض ہوں تو ان سے خواہش کی جاتی ہے کہ وہ ایسے مریضوں کو مزید بہتر علاج کے لئے سرکاری اسپتال بھیج دے۔
