تلنگانہ ۔ مہاراشٹر کی سرحد پر شیر کی موجودگی سے عوام میں سنسنی

تلنگانہ اور مہاراشٹر سرحد پر شیر کی موجودگی سے لوگوں میں سنسنی پھیل گئی ہے۔ سنسنی اس وجہ سے بھی ہے کہ اس طرح کے شیر کئی لوگوں کو نشانہ بناچکے ہیں۔

تلنگانہ کے ضلع عادل آباد میں واقع تلنگانہ ۔ مہاراشٹر کی سرحد پر شیر کی موجودگی سے علاقہ کے عوام میں سنسنی پائی جانے لگی ہے۔ خوفزدہ لوگ گھروں سے نکلنے سے گریز کررہے ہیں۔ اب تک دو افراد اس شیر کا نشانہ بن چکے ہیں۔ تازہ طور پر ایک اور نوجوان کو اس نے ہلاک کیا ہے۔

عادل آباد اور آصف آباد کے جنگلاتی علاقہ کے قریب رہنے والے افراد نے اس شیر کی موجودگی پر تشویش کا اظہار کیا ہے۔ اس شیر نے قبل ازیں مویشیوں پر حملے کئے تھے تاہم اب اس نے انسانوں کو نشانہ بنانا شروع کردیا ہے۔ اس خونخوار جانور کا نشانہ بننے والوں کی تعداد بڑھ کر تین ہوگئی ہے۔

واضح رہے کہ گزشتہ سال نومبر میں آصف آباد ضلع کے دیہی علاقہ کے بھگنیش نامی نوجوان، پنچکل پیٹ منڈل کے کونڈاپلی میں نرملا نامی خاتون کی موت شیر کے حملہ میں ہوگئی تھی۔ موجودہ طور پر عادل آباد ضلع میں مہاراشٹر کے ایوت محل ضلع میں اویناش نامی نوجوان کو اس شیر نے نشانہ بنایا ہے۔

اویناش گھر سے روانہ ہوا تھا تاہم گھر واپس نہ آنے پر اس کے ارکان خاندان نے قریب میں اس کی تلاش شروع کی۔ مقامی افراد نے دیکھا کہ شیر کے قریب اویناش کی لاش پڑی ہے۔ ان افراد نے چیخ وپکار کی جس پر شیر وہاں سے بھاگ گیا۔ اس کی تصاویر مقامی افراد نے اپنے سل فونس میں لے لی۔

(یو این آئی)