تلنگانہ کے وزیر خزانہ ٹی ہریش راؤ پر وزیراعلی کے سی آر نے پھر ایک مرتبہ مکمل اعتماد کا اظہار کرتے ہوئے وزارت صحت کی زائد ذمہ داری سپرد کردی ہے۔
سیاسی حلقوں‘میڈیا کے علاوہ سوشیل میڈیا پر حضور آباد میں ٹی آر ایس کی شکست پر ہریش راؤ کو بڑے پیمانہ پر ٹرول کیا جارہا تھا۔ دوباک کے بعد وزیراعلی نے حضور آباد ضمنی انتخاب کی ذمہ داری ہریش راؤ کو سونپی تھی۔
ہریش راؤ نے تقریباً چار ماہ تک حضور آباد میں پارٹی امیدوار جی سرینواس یادو کیلئے انتخابی مہم چلائی تھی۔ تاہم بی جے پی امیدوار ایٹالہ راجندر کوکامیابی حاصل ہوئی، اس کے بعد قیاس آرائیاں کی جارہی تھیں کہ پارٹی قیادت ہریش راؤ کو نظر انداز کرے گی لیکن کے سی آر نے ہریش راؤ کی کارکردگی پر مکمل اطمینان کا اظہار کیا اور اپنے پاس موجود وزارت صحت کی زائد ذمہ داری انہیں سونپ دی ہے۔
یہ بھی پڑھیں:چندرا بابو نے تیلگودیشم رہنماؤں کی گرفتاری کی مذمت کی
ایٹالہ راجندر کو وزارت سے برطرف کرنے کے بعد وزارت صحت کا قلمدان وزیراعلی نے اپنے پاس رکھا تھا ۔ وزیراعلی نے وزارت صحت کی زائد ذمہ داری سے متعلق فائل راج بھون کو روانہ کردی اور گورنر کے دستخط کے بعد احکامات جاری کردیئے گئے۔
ہریش راؤ تلنگانہ تحریک کی ابتداء سے چندر شیکھر راؤ کے ساتھ رہے ہیں اوروہ ان کے بھانجے بھی ہیں۔
