تلنگانہ کے اسمبلی حلقہ ناگرجنا ساگر کے ضمنی انتخاب کے پیشِ نظر پولیس کی جانب سے سختی کی جارہی ہے اور سیاسی قائدین کی گاڑیوں کی تلاشی لی جارہی ہے۔ اس سلسلہ میں آج پولیس نے کئی رہنماؤں کی کاروں کی تلاشی لی۔ یہ تلاشی چیک پوسٹوں پر کی گئی۔ ناگرجنا ساگر اسمبلی کے ضمنی انتخاب کے سلسلہ میں پولیس کی جانب سے وزرا، عوامی نمائندوں اور دیگر تمام کی گاڑیوں کی تلاشی لی جارہی ہے۔
پولیس کے مطابق ضمنی انتخاب میں رائے دہندوں کو راغب کرنے کے لئے رقم اور شراب کی تقسیم کو روکنے کے لئے مختلف مقامات پر بنائے گئے چیک پوسٹوں پر یہ تلاشی مہم چلائی جارہی ہے۔ الیکشن کمیشن کی ہدایت کے مطابق یہ تلاشی لی جارہی ہے۔ اس حلقہ میں انتخابی تشہیری مہم کے لئے جانے والے عوامی نمائندوں کی گاڑیوں کی بھی تلاشی لی گئی۔
تلاشی مہم کے دوران مریال گوڑہ کے ڈی ایس پی سرینواس نے میڈیا نمائندوں سے بات کرتے ہوئے کہا کہ اس حلقہ کے ضمنی انتخاب کے سلسلہ میں پولیس کی جانب سے مسلسل نگرانی رکھی جارہی ہے، اور کسی کو بھی قانون کی خلاف ورزی کرنے کی اجازت نہیں دی جائے گی، ساتھ ہی ووٹروں کو لالچ دینے کی کسی بھی کوشش کو ناکام بنایا جائے گا۔
یو این آئی
