تلنگانہ حکومت نے زوال پذیر کورونا وبا کے پیش نظر یکم ستمبر سے ریاست کے تمام تعلیمی ادارے دوبارہ کھولنے کا فیصلہ کیا ہے۔
وزیراعلی کے چندرشیکھرراو نے وزراء سبیتا اندرا ریڈی، ایرابیلی دیاکر راؤ، اورحکومت کے چیف سیکریٹری سومیش کمار اور سینئر عہدیداروں سے ملاقات کی۔ اور اس میٹنگ میں اسکولز کو دوبارہ کھولنے پر تبادلہ خیال کیا گیا۔بعد ازیں یکم ستمبر سے آنگن واڑی سمیت ریاست کے تمام تعلیمی ادارے دوبارہ شروع کرنے کا فیصلہ کیا گیا ہے۔
وزیراعلیٰ نے تمام لائیو کلاسز شروع کرنے کا گرین سگنل دے دیا ہے۔ وزیراعلی کے سی آر نے کہا کہ تعلیمی شعبے میں کورونا کی وجہ سے الجھن تھی۔ طلبہ اور نجی اساتذہ نے کہا کہ وہ مشکل میں ہیں۔ طبی حکام کا کہنا ہے کہ سکولوں کی طویل بندش نے بچوں پر دباؤ بڑھایا ہے۔ وزیراعلی نے کہا کہ تمام مسائل کا جائزہ لینے کے بعد تعلیمی اداروں کو دوبارہ شروع کرنے کا فیصلہ کیا گیا۔
یہ بھی پڑھیں:تلنگانہ میں معاشی ترقی کی شرح میں اضافہ: ہریش راو
سرکاری سکولوں کی صفائی کی ذمہ داری میونسپل اور پنچایتی راج محکموں کے حوالے کی جائیں گی۔ تعلیمی اداروں کواس ماہ کی 30تاریخ تک سانیٹائز کرنے کا حکم دیا گیا ہے۔
تعلیمی ادارے گزشتہ مارچ میں کورونا کے زیر اثر بند ہوئے۔ درمیان میں کلاسیز جزوی طور پر شروع ہوئیں۔ دوسرا مرحلہ دوبارہ آن لائن پڑھانے تک محدود تھا کیونکہ وبا کی شدت میں اضافہ ہوا تھا۔تاہم پچھلے کچھ دنوں سے ریاست بھر میں کورونا کے بہت کم کیسز رپورٹ ہوئے ہیں۔
