ریاست تلنگانہ کے ضلع نرمل میں ایک سڑک حادثہ پیش آیا جس میں ایک نوجوان ہلاک جبکہ دوسرا زخمی ہوگیا۔ یہ نوجوان ضلع مستقر کے منجلاپور علاقہ سے اپنی ٹووہیلر پر جارہے تھے کہ آرٹی سی بس نے ان کی بائیک کو ٹکر دے دی۔
پولیس نے بتایا کہ اس حادثہ میں نوجوان 20 سالہ راہیل بیگ موقع پر ہی جاں بحق ہوگیا جبکہ شیخ انور جو گاڑی کی پچھلی نشست پر سوار تھا شدید زخمی ہوگیا۔
پولیس نے بتایا کہ یہ نوجوان دلاورپور منڈل مرکز کے رہنے والے ہیں۔ حادثے کے بعد علاج کے لئے ایریا ہسپتال نرمل منتقل کیاگیا۔ اطلاع ملتے ہی پولیس وہاں پہنچی جس نے لاش کو پوسٹ مارٹم کے لئے بھیج دیا۔
عینی شاہدین نے بتایا کہ بس ڈرائیور کی لاپرواہی کے نتیجہ میں یہ حادثہ پیش آیا۔یہ بس بھینسہ ڈپو کی تھی۔
