آج کل نوجوانوں میں تن سازی اور جسم کو خوبصورت بنانے کا شوق زیادہ ہو گیا ہے اس کی وجہ سے نوجوان اکثر جم کا رخ کرتے ہیں لیکن آج کل کے زیادہ تر کوچ کو تن سازی کے بارے میں علم نہیں ہے ۔
جب وہ ان نوجوانوں کی رہنمائی کرتے ہیں تو مناسب غذا اور ورزش بتانے سے قاصر ہوتے ہیں۔ باڈی بلڈنگ کے دوران بعض افراد مختلف قسم کی ادویات ہارمون فوڈ سپلیمنٹ استعمال کرتے ہیں جس سے وقتی طور پر ابھر آتے ہیں لیکن باڈی بلڈنگ کے بعد جسم کو معمول کے مطابق ورزش نہ کرنے سے منفی اثرات کا سامنا کرنا پڑتا ہے۔
جو باڈی بلڈنگ میں ادویات کا استعمال کرتے ہیں ان کا جسم باڈی بلڈنگ چھوڑنے کے بعد موٹا ہو جاتا ہے وزن بڑھ جاتا ہے اور دل اور جوڑوں کے امراض پیدا ہوتے ہیں وقتی طور پر مضبوط نظر آنے والا جسم اندر سے کھوکھلا ہو جاتا ہے۔
زیادہ مقدار میں ان سپلیمنٹس کے استعمال سے کئی نوجوانوں کی موت واقع ہوچکی ہے۔ یہ سپلیمنٹ بیرون ممالک سے فراہم کیے جاتے ہیں۔ نوجوانوں کی موت کی ذمہ دار ادویات سے زیادہ ہماری حکومت ہے جوان غیر تصدیق شدہ ادویات کے خلاف کوئی کارروائی نہیں کرتی۔
ہم نے 65 سالہ عبدالمجیب جو جم کے کوچ ہیں ان سے ملاقات کی انہوں نے نوجوانوں کو ادویات سے دور رہنے اور ترکاری اور پھل استعمال کرنے کا مشورہ دیا۔ انہوں نے کہا کہ ماہر کوچس کے زیرنگرانی ورزش کی جائے تو صحت کے لئے بہتر ہوگا۔
اس سلسلے میں ڈاکٹروں نے نوجوانوں سے اپیل کی کہ وہ سپلیمنٹ سے دوری اختیار کریں اپنے جسم کو چست تندرست اور بہتر بنانے کے لئے اچھی غذا کا استعمال کریں۔
