کسان اور مزدور بچاؤ نعرے کے تحت ہر ضلع اور اسمبلی حلقے کی سطح پر پارٹی نے احتجاجی مظاہرے منظم کئے اور مخالف کسان قوانین سے دستبرداری کا مطالبہ کیا۔
اے آئی سی سی انچارج برائے تلنگانہ مانکیم ٹیگور نے سنگا ریڈی میں احتجاج کی قیادت کی۔ صدرپردیش کانگریس اتم کمار ریڈی، سابق نائب وزیر اعلی دامودر راج نرسمہا ، سابق وزیر ڈاکٹر جے گیتا ریڈی ، اے آئی سی سی سکریٹری بوس راجو، سابق ارکان پارلیمان سریش شیٹکر ، پونم پربھاکر ، متعلقہ رکن اسمبلی جگا ریڈی کے علاوہ ضلع کے دیگر رہنما احتجاج میں شریک تھے۔
طویل ریلی کی شکل میں کانگریس رہنما مہاتما گاندھی کے مجسمے کےپاس پہنچے اور خراج عقیدت پیش کیا۔ اس موقع پر خطاب کرتے ہوئے مانکیم ٹیگور نے پارٹی کارکنوں سے اپیل کی کہ وہ کانگریس کی اقتدار میں دوبارہ واپسی کے مقصد سے متحرک ہوجائیں۔
انہوں نے کہا کہ وہ تلنگانہ میں ویژن 2023 کی تکمیل کے لئے بطور انچارج مقرر کئے گئے ہیں اور آئندہ اسمبلی انتخابات میں کانگریس کو 79 نشستوں پر کامیابی حاصل ہونی چاہئے۔ انہوں نے کہا کہ اندرا گاندھی نے میدک سے انتخابات میں حصہ لیا تھا۔
سونیا گاندھی نے تلنگانہ عوام کی بھلائی کے لئے علحدہ ریاست تشکیل دی تھی لیکن کے چندرشیکھرراو اور ان کے خاندان کو فائدہ پہنچا ہے۔ نئی ریاست کے فوائد سے عوام محروم رہے۔ انہوں نے الزام عائد کیا کہ وزیراعلی کے سی آر اور ان کے ارکان خاندان 6 برس میں غیر معمولی اثاثہ جات کے مالک بن گئے۔
یہ بھی پڑھیں:حیدرآباد کا اہم ذخیرہ آب، شدید بارش کے باوجود خشک کیوں ہوتا جا رہا ہے؟
