حیدرآباد میں مشترکہ تنظیموں کی جانب سے ایمبولنس خدمات کا آغاز کیا گیا۔ ایڈیشنل ڈی جی پی سواتی لکھا نے ایمبولینس کا افتتاح ہری جھنڈی دکھا کر کیا۔ تنظیم حیدرآباد ویلفیئر کونسل کے تحت اس ایمبولنس خدمات کا آغاز کیا گیا ہے۔
اس خدمات میں دو ایمبولنس خصوصی طور پر خواتین کے لئے مختص ہیں۔ جس میں ڈرائیور کی خدمات خواتین ہی دیں گی۔
یہ ایمبولینس سروس 24 گھنٹے تک جاری رہے گی۔ ایڈیشنل ڈی جی پی سواتی لکھا نے میڈیا سے بات کرتے ہوئے کہا کہ موجودہ دور میں متحد ہو کر عوام کی خدمت کرنا ضروری ہے۔
انہوں نے حیدرآباد ویلفیئر کونسل کا شکریہ ادا کیا انہوں نے کہا کہ حیدرآباد میں کورونا وائرس سے لڑنے کے لیے حکومت کے ساتھ ان تنظیموں نے بڑھ چڑھ کر حصہ لیا ہے۔
اس موقع پر سکینہ فاؤنڈیشن کے صدر آصف حسین سہیل نے کہا کہ حیدرآباد میں خاص طور پر کووڈ-19 سے متاثر افراد کی لاشوں کو منتقل کرنا مشکل ہو گیا ہے۔ ایسی لاشوں کو منتقل کرنے کے لیے بھاری رقم وصول کی جارہی ہے، مریضوں کو گھر سے ہسپتال منتقل ہونے میں کافی مشکلات پیش آرہی ہے۔ انہی حالات کو مدنظر رکھتے ہوئے تمام مشترکہ تنظیموں نے 30 ایمبولینس خدمات کا آغاز کیا ہے۔
انہوں نے بتایا کہ دو مختص ایمبولنس خواتین مریضوں کی خدمات کے لیے خاتون ڈرائیور کے ساتھ ہوگی۔
اس موقع پر ڈی سی پی ویسٹ زون سری نواس، اور سماجی کارکن خالدہ پروین، حیدرآباد یوتھ کے صدر ظفر جیلانی، ڈاکٹر نسیم ماجد موجود تھے۔
