تلنگانہ تلگودیشم پارٹی کے صدر ایل رمنا کی جلد ہی حکمران جماعت میں شمولیت کی اطلاعات ہیں انہوں نے آج واضح کیا کہ 'انہوں نے اس خصوص میں ہنوز کوئی فیصلہ نہیں کیا ہے اور وہ پارٹی کارکنوں سے رائے اور مشورہ لینے کے بعد ہی حتمی فیصلہ کریں گے۔'
رمنا نے جگتیال ضلع میں میڈیا سے بات کرتے ہوئے کہا کہ 'ریاست کی سیاست میں توقع کے مطابق تبدیلیاں آرہی ہیں۔ پارٹیاں وقتاً فوقتاً صورتحال کاجائزہ لے رہی ہیں۔' اس کے پیش نظر برسر اقتدار جماعت ٹی آر ایس کے علاوہ بی جے پی نے ان کو پارٹی میں شامل ہونے کی دعوت دی ہے۔
این ٹی راما راؤ اور چندرا بابو نے ان کی حوصلہ افزائی کی ہے۔ تلگودیشم نے ان کو وزیر اور ایم پی کے عہدے دیئے۔ انہوں نے کبھی عہدوں کی مانگ نہیں کی بلکہ عوام کے لئے کام کیا ہے۔
ایل رمنا نے کہاکہ 'پارٹی کی تبدیلی کے تعلق سے ٹی آر ایس سے کوئی بات نہیں ہوئی ہے۔ انہوں نے سوشیل میڈیا میں ان کے تعلق سے آنے والی اطلاعات کو غلط قرار دیا اور کہا کہ 'ہر کسی کے خیالات معلوم کرنے کے بعد ہی وہ فیصلہ کریں گے۔' ایل رمنا نے کہا کہ 'ٹی آر ایس سے ان کو کوئی یقین دہانی نہیں کروائی گئی۔'
(یو این آئی)
