کے سی آر نے نریندر مودی کو ایک خط لکھ کر کہا کہ ‘مرکزی ملازمتوں کےلیے منعقد ہونے والے تمام مسابقتی امتحانات جیسے سنٹرل پی ایس یوز، ریلوے، ڈیفنس سرویس اور نیشنلائزڈ بنکز وغیرہ ہندی اور انگریزی زبانوں میں ہی ہوتے ہیں جبکہ جو لوگ انگریزی میڈیم سے تعلیم حاصل نہیں کرتے یا غیرہندی ریاستوں کے افراد کو ان مسابقتی امتحانات میں مشکلات پیش آرہی ہیں۔
انہوں نے خط میں لکھا کہ بھارت کے تمام ریاستوں کے طلبا کو مساوی و منصفانہ مواقع فراہم کرنے کےلیے حکومت ہند اور اس کے محکموں میں بھرتیوں کےلیے تمام مسابقتی امتحانات کو علاقائی زبانوں میں لکھنے کی اجازت دی جانی چاہئے۔
تلنگانہ کے وزیراعلیٰ نے ایک اور خط صدر رام ناتھ کوویند کو بھی لکھا جس میں انہوں نے صدر جمہوریہ سے ان کے سالانہ جنوبی ہند کے عارضی قیام کے موقع پر سابق وزیراعظم پی وی نرسمہا راؤ کے اعزاز میں یادگار ڈاک ٹکٹ جاری کرنے کی درخواست کی۔
انہوں نے کہاکہ یہاں ڈاک ٹکٹ جاری کرنا سابق وزیراعظم کےلیے بہترین خراج ہوگا جبکہ پی وی نرسمہا راؤ ایک اصلاح پسند اور کثیر الجہتی رہنما تھے جنہوں نے ملک میں معاشی اصلاحات کا آغاز کیا تھا اور ان کا تعلق ریاست سے تھا۔
