اسپیکر تلنگانہ اسمبلی پی سرینواس ریڈی کی پوتی کی شادی کی تقریب میں وزیراعلی تلنگانہ چندر شیکھر راؤ اور وزیراعلی آندھرا پردیش جگن موہن ریڈی کے علاوہ دونوں ریاستوں کی اہم سیاسی شخصیتوں و اعلیٰ عہدیداروں نے شرکت کی۔
پوچارم سرینواس ریڈی کی پوتی کی شادی جگن موہن ریڈی کے آفیسر ان اسپیشل ڈیوٹی پی کرشنا موہن ریڈی کے فرزند سے انجام پائی۔
شمس آباد ایر پورٹ کے قریب واقع ایک فنکشن ہال میں یہ تقریب منعقد ہوئی۔ دونوں وزرائے اعلی نے ساتھ شادی کی رسومات کا مشاہدہ کیا اور بعد میں جوڑے کو آشیرواد دیا۔ کے سی آر اور جگن کچھ دیر تک آپس میں بات کرتے رہے اور دونوں خوشگوار موڈ میں تھے۔
آندھرا پردیش اسمبلی کے اسپیکر ٹی سیتا رام، نائب وزیراعلی ٹی شراونی، کئی ریاستی وزراء کے علاوہ گورنر ہریانہ بنڈارو دتاتریہ اور آندھرا پردیش کے کئی وزراء اور اعلیٰ عہدیداروں نے شرکت کی۔ وائی ایس وجے لکشمی نے بھی تقریب میں شرکت کی اور نئے جوڑے کو آشیرواد دیا۔
واضح رہے کہ دونوں ریاستوں کے درمیان حالیہ عرصہ میں کرشنا اور گوداوری کے پانی کی تقسیم کے مسئلہ پر تنازعہ پیدا ہوا ہے۔ بتایا جاتا ہے کہ جگن اور کے سی آر نے آپس میں جو بات چیت کی وہ تنازعہ یا کسی سیاسی مسئلہ پر نہیں تھی بلکہ ایک دوسرے کی خیریت اور ریاستوں کی صورتحال سے متعلق رسمی تبادلہ خیال تھا۔اگرچہ دونوں ریاستوں کے درمیان مختلف اُمور پر اختلافات ہیں لیکن اہم شخصیتوں کے گھرانوں میں باہمی رشتے خوش آئند ہیں۔
