موتیوں کا شہر حیدرآباد اب حادثات کا شہر بنتا جارہا ہے۔ جہاں آئے دن جرائم و حادثات کے کئی واقعات پیش آرہے ہیں۔ تازہ واقعہ حیدرآباد کے ہائی ٹیک سٹی کے علاقے گچی باؤلی میں پیش آیا جہاں ایک سڑک حادثہ میں پانچ نوجوان ہلاک ہوگئے۔ بتایا جارہا ہے کہ حیدرآباد کے گچی باؤلی وِپرو سرکل پر ٹِپر لاری نے صبح کی اولین ساعتوں میں 3 بجے کے وقت ایک کار کو ٹکر ماردی۔ جس کے سبب چار نوجوان بر سر موقع ہی ہلاک ہوگئے۔ جب کہ ایک نوجوان شدید زخمی ہوگیا۔
حادثہ میں شدید زخمی شخص کو گچی باؤلی ہی کے ایک نجی اسپتال لے جایا گیا تاہم علاج کے دوران وہ فوت ہوگیا۔ ہلاک شدگان کی نعشوں کو پوسٹ مارٹم کے لئے عثمانیہ اسپتال منتقل کردیا گیا ہے۔ گچی باؤلی پولیس کا خیال ہے کہ حادثے کی وجہ گاڑی کی تیز رفتاری تھی۔
پولیس نے ہلاک ہونے والے افراد کی شناخت 25 سالہ کٹراگڈا سنتوش، چِنتھا موہن (22) ، بھردواج (20) ، روشن اور پون کے نام سے کی ہے۔ یہ پانچوں ہی دوست حیدرآباد کے مادھا پور کے مینز ہاسٹل میں قیام پذیر تھے۔ پولیس نے ایک کیس درج کرتے ہوئے تحقیقات کا آغاز کردیا ہے۔
