لگتا ہے کہ بجلی محکمہ لاک ڈاؤن کے دوران ہوئے معاشی بحران کو مستحکم کرنے کیلئے پائی پائی عوام سے وصول کرنے کا ارادہ رکھتی ہے۔
لاک ڈاؤن کے بعد عوام کو تین ماہ کے مجموعی بجلی بل وصول ہونے لگے ہیں، عوام کو ہزاروں روپئے کے بل موصول ہورہے ہیں جو معمول سے تین گنا زیادہ ہیں، جس سے عوام شدید ناراض ہے اور حکومت کے خلاف برہمی ظاہر کی جارہی ہے۔
حیدرآباد سے 60 کلو میٹر شادنگر میں ایک موبائل شاپ کو تین ماہ کا 1204738 بل وصول ہوا ہے۔
ایس ایم موبائل شاپ کے مالک محمد کلیم بجلی بل کو دیکھ کر حیرت زدہ ہوگئے، انہیں اپنی آنکھوں پر یقین نہ آیا کہ یہ رقم صحیح ہے یا نہیں۔
انہوں نے بتایا کہ ان کی چھوٹی سی دوکان جو لاک ڈاؤن کے دوران مکمل بند رہی اور ڈھائی ماہ کے بعد بجلی بل وصول ہوا تو انہیں یقین نہ آیا کہ یہ بل ان کی دوکان کا ہے۔
انہوں نے محکمے کی لاپرواہی پر ناراضگی کا اظہار کیا۔ انہوں نے کہا کہ وہ اس سلسلے میں محکمے سے رجوع کریں گے۔
