تلنگانہ حکومت کی غریبوں کو باوقار ڈبل بیڈروم مکانات کی مفت فراہمی کی اسکیم کے تحت وعدہ کے مطابق مکانات فراہم کرنے میں ناکامی کا الزام لگاتے ہوئے سدی پیٹ ضلع گجویل منڈل کے کولگور دیہات کے افراد نے وزیر فائنانس ہریش راؤ کا پتلہ نذرآتش کیا۔
سدی پیٹ حلقہ کی اسمبلی میں ہریش راؤ نمائندگی کرتے ہیں۔گاوں والوں نے ڈبل بیڈروم مکانات کی فراہمی کے مطالبہ پر احتجاج کیا۔کولگور کی ذمہ داری ہریش راؤ نے قبول کی تھی۔ مقامی افراد کے ساتھ ساتھ اس احتجاج میں بی جے پی کے مقامی لیڈروں اور کارکنوں نے بھی حصہ لیا۔
ان احتجاجیوں نے کہاکہ ان کو ڈبل بیڈروم مکانات کی فراہمی کی یقین دہانی کروائی گئی تھی تاہم ہنوز ان کو ڈبل بیڈروم مکانات فراہم نہیں کئے گئے۔ان احتجاجیوں نے ہریش راو کے خلاف نعرے بازی کی۔پولیس نے احتجاجیوں کو حراست میں لے لیا۔اس اچانک احتجاج کی وجہ سے کچھ دیر کیلئے کشیدگی پھیل گئی۔
یو این آئی
