ریوینیو ڈیویژنل آفیسر رنگا ریڈی ڈسٹرکٹ نے یونیورسٹی کے ذمہ داران کو مکتوب جاری کرتے ہوئے لکھا کہ حکومت تلنگانہ و ضلع کلکٹر کی ہدایات کے مطابق کورونا وائرس کے پھیلاؤ پر قابو پانے کے لیے مولانا آزاد نیشنل اردو یونیورسٹی کی عمارتیں خصوصی وارڈز کے قیام کے لیے عارضی طور پر استعمال کی جائیں تاکہ بیرون ممالک سے ایئرپورٹ پہنچنے والے مشتبہ افراد کو اس میں منتقل کیا جا سکے۔
آر ڈی او نے مزید لکھا کہ چیف سکریٹری و محکمۂ صحت کے عہدیداروں کے اجلاس میں شہر میں کورونا کے مشتبہ افراد کی منتقلی کےلیے احتیاطی طور پر مزید وارڈز کے قیام کی ضرورت ہے جہاں مناسب سہولیات موجود ہوں، اردو یونیورسٹی کو اس کے لیے موزوں پایا گیا۔
ضلع انتظامیہ کا ماننا ہے کہ یونیورسٹی ائیرپورٹ سے قریب ہے اور آمد و رفت آسان ہے اور کم وقت میں مسافروں کو ائیرپورٹ سے یہاں منتقل کرنے میں آسانی ہوگی۔
مولانا آزاد نیشنل اردو یونیورسٹی کے طلباء اس مقام پر خصوصی وارڈز کے قیام کی مخالفت کر رہے ہیں ان کا ماننا ہے کہ یونیورسٹی میں ان وارڈز کے قیام سے یونیورسٹی کے ہاسٹل میں قیام پذیر طلباء، اساتذہ و دیگر ملازمین اس سے متاثر ہوں گے۔
طلباء یونین نے اس سلسلے میں رجسٹرار کو مکتوب کے ذریعے یونیورسٹی میں خصوصی وارڈز کے قیام کی اجازت نہ دینے کی درخواست کی اور ٹویٹ کے ذریعے جی ایچ ایم سی، ضلع انتظامیہ اور حکومت سے کسی اور مقام پر ان وارڈز کے قیام کا مطالبہ کرتے ہوئے وارڈز کے قیام پر مخالفت کا انتباہ دیا۔
