مرکزی وزارت جل شکتی کے ایڈیشنل سکریٹری ارون بھروکا کی قیادت میں دیگر وزارتوں سے وابستہ اعلیٰ عہدیداروں پر مشتمل مرکز کی ٹیم 24 اپریل کو حیدرآباد پہنچی تھی۔
اس ٹیم نے 25 اپریل تا 2 مئی کے دوران شہر کے مختلف ہسپتالوں، علاقوں، کنٹینمنٹ زونس، کورنٹائن زونس، شیلٹر ہومز، رعتوں بازار، اناپورنا کینٹن، مختلف محکموں کے دفاتر کے علاوہ دیگر مقامات کا دورہ کیا تھا اور مقامی افراد، مریضوں، عملہ، عہدیداروں کے بشمول دیگر افراد سے بات چیت کرکے حالات کا جائزہ لیا تھا۔
مرکزی ٹیم نے چیف سکریٹری سومیش کمار، ڈائرکٹر جنرل آف پولیس مہندر ریڈی، پرنسپل سکریٹری صحت شانتی کماری، جی ایچ ایم سی کمشنر لوکیش کمار کے علاوہ دیگر اعلیٰ عہدیداروں سے بھی ملاقات کی۔
واضح رہے کہ مرکزی ٹیم نے کورونا وائرس سے نمٹنے کےلیے ریاستی حکومت کی جانب سے کئے جارہے اقدامات اور لاک ڈاون کے بہتر نفاذ پر اطمینان کا اظہار کیا ہے۔
وہیں دوسری جانب تلنگانہ بی جے پی کے صدر بنڈی سنجے نے الزام عائد کیا ہے کہ کورونا وائرس سے پیدا شدہ صورتحال کا جائزہ لینے کےلیے آئی مرکزی ٹیم کوریاستی حکومت نے گمراہ کیا ہے۔ تلنگانہ بی جے پی نے گاندھی ہسپتال میں ناقص سہولیات کی شکایت کی ہے۔
