انسانی حقوق کے سرگرم رکن اور مؤرخ رام پنیانی نے گذشتہ شب حیدرآباد میں ایک پروگرام میں خطاب کرتے ہوئے کہا کہ ملک میں اقلیتوں کے ساتھ ساتھ خواتین اور دلت بھی خوف میں مبتلا ہیں، مسلم نوجوانوں کو دہشت میں مبتلا کرنے کے لیے ہجومی تشدد کیا جا رہا ہے۔ اس کے علاوہ دنیا بھر میں تیل کی دولت کے قبضہ کو لے کر اسلام کے خلاف نفرت پھیلائی جا رہی ہے۔
رام پنیانی اسٹوڈنٹز اسلامک آرگنائزیشن آف انڈیا ( ایس آئی او ) حیدرآباد یونٹ کی جانب سے جاری مہم '' ملک کی تعمیر کریں '' کی اختتامی نشست یوتھ کانکلو میں مہمان خصوصی کی حیثیت سے شرکت کی۔
واضح رہے کہ رام پنیانی انڈین انسٹی ٹیوٹ آف ٹیکنالوجی ممبئی میں بائیو میڈیکل انجنیئرنگ کے سابقہ پروفیسر ہیں اور وہ سماجی ہم آہنگی کے طور پر کام کرنے کے لیے پورے ملک میں مشہور ہیں۔
انہوں نے کہا کہ بھارت میں مخصوص ایجنڈے کو فروغ دینے کے لیے مذہبی اقلیتوں کو نشانہ بنایا جا رہا ہے۔نفرت کو پھیلانے کے لیے قوت اور سیاست کا غلط استعمال ہو رہا ہے۔
پنیانی نے ملک کی تعمیر کے ضروری اقدار جیسے بھائی چارہ، بین مذہبی و بین اللسانی اور بین ثقافتی اتحاد، بدعنوانی سے پاک معاشرہ اور سماج کے ہر طبقے کی ہمہ جہت ترقی پر زور دیا۔
انھوں نے کہا کہ انسانیت اور ملک کو در پیش مسائل کو نفرت کی بجائے محبت، آپس میں مضبوط تعلقات اور بھارتی تہذیب کو فروغ دینے کے ذریعے حل کیا جا سکتا ہے ۔انسانی حقوق کی تنظیموں کو مل کر فاششٹ اور فسادی قوتوں کے خلاف لڑنا ہوگا۔
اس موقع پر ایس آئی او کے قومی صدر لبید شافی کے علاوہ حیدرآباد یونٹ کے دیگر ذمہ داران اور نوجوانوں کی کثیر تعداد موجود تھی ۔
