تلنگانہ کے وزیر صحت ہریش راؤ نے کہا ہے کہ آئندہ چند ہفتوں میں محکمۂ صحت میں تقریباً 13 ہزار ملازمتوں کو پُر کیا جائے گا۔ انہوں نے ضلع رنگاریڈی کے نارسنگی میں ٹی ڈائگناسٹک منی ہب اورٹی ڈائگناسٹک موبائل ایپ کا افتتاح انجام دیا۔انہوں نے اس موقع پر کہا کہ تلنگانہ میں ہر سطح پر طبی انفراسٹرکچر میں اضافہ کے لئے بڑے پیمانہ پر مساعی کی جارہی ہے۔ انہوں نے کہا کہ نظامس انسٹی ٹیوٹ آف میڈیکل سائنسس(نمس)میں دوہزاربستروں کی سہولت شروع کی جائے گی۔
انہوں نے واضح کیا کہ گذشتہ چند برسوں کے دوران حکومت نے 350بستی دواخانوں کا قیام عمل میں لایاجن کے ذریعہ مقامی سطح پر شہری غریبوں کو نگہداشت صحت خدمات فراہم کی جارہی ہیں۔حیدرآباد کے ہر بستی دواخانہ میں 57قسم کی تشخیصی خدمات فراہم کی جارہی ہیں جن میں آنے والے مہینوں میں اضافہ کرتے ہوئے ان کو 134 کردیا جائے گا۔ انہوں نے کہاکہ اعضا کی پیوند کاری کو سرکاری اسپتالوں میں یقینی بنایاجارہا ہے۔ ساتھ ہی گھٹنے کی تبدیلی کی سرجری بھی گاندھی اسپتال، عثمانیہ اسپتال اور اضلاع کے اسپتالوں میں کی جارہی ہے۔
ریاستی وزیر تعلیم سبیتااندراریڈی، رکن پارلیمنٹ رنجیت ریڈی، رکن کونسل پٹلم مہیندرریڈی، رکن اسمبلی پرکاش گوڑاور محکمہ صحت کے دیگر سینئر عہدیداراس موقع پر موجود تھے۔
یو این آئی
