حیدرآباد کے علاقہ محمدی لائن سے تعلق رکھنے والا 10 سالہ سید عزیز ریحان اپنی بہن سکینہ بیگم کے علاج کے لیے رقم جمع کرنے کے لیے ٹولی چوکی چوراہے پر صبح کے اوقات میں کبوتر کے دانے فروخت کرتا ہے، دانہ فروخت کرنے کے بعد ریحان تعلیم حاصل کرنے کے لیے مدرسہ بھی جاتا ہے۔
اس دوران مختلف علاقوں سے والدین اپنے بچوں کے ساتھ صبح کے اوقات میں یہاں پہنچتے ہیں اور کبوتروں کو دانہ ڈالتے ہیں، بچے کبوتروں کو دیکھ کر بہت خوش ہوتے ہیں۔
سید عزیز ریحان کی خواہش ہے کہ جلد از جلد اس کا مال فروخت ہوجائے اور اس کی بہن کے لیے ادویات کا انتظام ہوسکے۔
ریحان روزانہ صبح 6 بجے ٹولی چوکی پہنچ جاتے ہیں اور آٹھ بجے صبح تک کبوتروں کو دانا فروخت کرتے ہیں-
ریحان کی والدہ بلقیس بیگم نے کہا کہ ان کی بیٹی سکینہ کی ریڈیشن تھراپی کے لیے ان کو حکومت کی جانب سے رقم ملی ہے جس کے ذریعہ کچھ راحت ملی ہے۔
وہیں مریضہ سکینہ بیگم نے کہا کہ میں پچھلے پانچ سال سے کینسر کے مرض میں مبتلا ہوں، میری ادویات کے لیے کافی خرچ ہوتا ہے، میرے علاج کے لیے میرا بھائی ریحان کبوتر کا دانہ فروخت کرتا ہے۔
