نیشنل کانفرنس نے اس بات پر تشویش کا اظہار کیا ہے کہ بیرونی ریاستوں سے بڑی تعداد میں مزدوروں کو بغیر کووڈ ٹیسٹ کیے وادی کشمیر میں داخل ہونے کی اجازت دی جا رہی ہے۔
پارٹی کے ترجمان عمران نبی ڈار نے اپنے ایک بیان میں اس بات پر حیرت کا اظہار کیا کہ ایک جانب جہاں مقامی انتظامیہ کورونا وائرس کی روک تھام کے لئے بڑے بڑے اقدامات کرنے کے دعوے کر رہا ہے۔ وہیں دوسری جانب بیرون ریاستوں سے بڑی تعداد میں مزدوروں کو وادی میں بنا کسی ٹیسٹنگ کے داخل ہونے کی اجازت دے رہا ہے۔
انہوں نے کہا کہ ملک میں کورونا بےقابو ہو گیا ہے اور جموں و کشمیر انتظامیہ کی بے حسی اور غیر سنجیدگی سے یہاں بھی ایسے ہی حالات پیدا ہونے کا اندیشہ ہے۔
این سی کے ترجمان نے کہا کہ حد تو یہ ہے کہ بانہال ریلوے اسٹیشن پر بھی ٹیسٹنگ روک دی گئی یے اور اس کی وجہ عملے کی کمی بتائی جا رہی ہے جو کہ حد درجہ افسوس اور تشویش کی بات ہے۔
