نیشنل کانفرنس کے نائب صدر عمر عبداللہ نے وزیر داخلہ امت شاہ کے بیان پر ردعمل کا اظہار کرتے ہوئے کہا کہ جموں و کشمیر واحد ایسی جگہ ہے جہاں لیڈران کو انتخابات میں حصہ لینے اور جمہوری عمل کی حمایت کرنے پر بند کیا جاتا ہے اور ملک دشمن ہونے کا نام دیا جاتا ہے۔
عمر عبداللہ نے وزیر داخلہ امت شاہ کی ایک ٹوئٹ کو ری ٹویٹ کرتے ہوئے کہا: 'عزت مآب وزیر داخلہ کے حملے کے پیچھے چھپی مایوسی کو سمجھ سکتے ہیں۔ انہیں بتایا گیا تھا کہ پیپلز الائنس انتخابات کے بائیکاٹ کی تیاری کر رہا ہے۔ ہمارے بائیکاٹ سے بی جے پی اور نئی تشکیل دہ کنگز پارٹی کو کھلا میدان مل جاتا۔ ہم نے انہیں ایسا کرنے نہیں دیا'۔
انہوں نے ایک اور ٹوئٹ میں کہا: 'جموں و کشمیر واحد ایسی جگہ ہے جہاں لیڈران کو انتخابات میں حصہ لینے اور جمہوری عمل کی حمایت کرنے پر بند کیا جاتا ہے اور ملک دشمن ہونے کا نام دیا جاتا ہے۔ سچ یہ ہے کہ جو کوئی بی جے پی کی آئیڈیالوجی کی مخالفت کرتا ہے اس پر کرپٹ اور اینٹی نیشنل ہونے کا لیبل چسپاں کیا جاتا ہے'۔
ان کا مزید کہنا تھا: 'امت شاہ جی ہم گینگ نہیں ہیں۔ ہمارا ایک جائز سیاسی الائنس ہے۔ ہم انتخابات لڑتے آئے ہیں اور لڑتے رہیں گے۔ اس سے آپ کو مایوسی ہوتی ہے'۔
