جموں وکشمیر میں گزشتہ دو ہفتوں سے عالمی وبا کورونا وائرس کے یومیہ مثبت کیسز میں اضافہ درج ہوا ہے جس کے سبب لوگوں میں ایک دفعہ پھر تشویش کی لہر دوڑ گئی ہے۔
یونین ٹیریٹری میں عالمی وبا کورونا وائرس کے یومیہ مثبت معاملات میں اضافے کے پیش نظر مرکزی وزارت صحت کے سیکریٹری راجیش بھوشن نے جموں وکشمیر انتظامیہ کو تحریری طور وائرس کے پھیلاؤ کو روکنے کی خاطر زمینی سطح پر ٹھوس اقدامات اُٹھانے پر زور دیا۔
مرکزی ہیلتھ سیکریٹری نے مزید لکھا ہے کہ حالیہ ایام میں جموں وکشمیر میں کووڈ کیسز میں اضافہ دیکھنے کو ملا ہے جس پر روک لگانے کی خاطر ٹیسٹنگ کے عمل کو مزید فعال کیا جائے۔
انہوں نے مزید کہا ہے کہ کورونا رہنما اصولوں پر عملدرآمد کی خاطر زمینی سطح پر اقدامات اُٹھانے کی ضرورت ہے جبکہ شادی بیاہ اور دوسری تقاریب میں کم سے کم لوگوں کی شرکت کو یقینی بنانے کی خاطر بھی انتظامیہ کارکرگر اقدامات اٹھائے۔
خط میں مزید لکھا گیا کہ ٹیسٹنگ کے ساتھ ساتھ ٹیکہ کاری کے عمل کو بھی وسعت دی جائے۔ انہوں نے مزید کہا کہ ’’جن لوگوں نے ابھی تک کورونا ٹیکہ نہیں لگایا ہے اُنہیں فوری طور پر کورونا مخالف ویکسین لگوائی جائے تاکہ وائرس کے پھیلاؤ کو روکا جا سکے۔‘‘
