کشمیر میں شیعہ علماء دین نے کورونا وائرس کے بڑھتے پھیلاؤ کے پیش نظر محرم الحرام کے دوران عزاداری کی مجالس اور تقریبات کو منعقد کرنے کے دوران عزاداران امام حسین علیہ السلام سے اپیل کی ہے کہ وہ سختی سے کووڈ کے حوالے سے جاری رہنما خطوط پر عمل کریں اور مجالس کے دوران احتیاطی تدابیر سے کام لیں۔
علما کرام نے اس بات پر زور دیا ہے کہ عزاداری کو قائم کرنے کے متبادل اور احتیاطی طریقے کو اپناتے ہوئے عزادار اپنے آپ کو اور دوسروں کو کورونا وائرس سے محفوظ رکھیں۔
انہوں نے کہا کہ اس وقت جس دور سے ہم گزر رہے ہیں وہ مسائل سے پُر اور دشوار کن ہیں اور اس وقت کورونا وائرس نے دنیا بھر میں تباہی مچا رکھی ہے لہٰذا عزاداری کی مجالس کو اس طرح سے منعقد کرنا ہوگا جو دوسروں کے لئے باعث ضرر نہ بنیں۔
انہوں نے اس بات پر زور دیا کہ عاشقانِ اہل بیت اپنے گھروں کو ہی عزا خانوں میں تبدیل کریں۔
محدود پیمانے پر لوگوں کے ساتھ مجالس کا اہتمام کیا جائے اور احتیاطی تدابیر پر سختی سے عمل کریں۔
یہ بھی پڑھیں: محرم الحرام کے لئے جاری گائیڈ لائن غیر آئینی: مولانا کلب جواد
انہوں نے بتایا کہ مومنین آن لائن مجالس کا اہتمام کریں، جدید طریقۂ کار اپنا کر گھروں میں مجالس اور ذکر سنیں، کسی طرح کی کوئی لاپروائی نہ برتیں، مصافحہ کرنے اور ہاتھ ملانے سے پرہیز کریں، تبرکات کی تقسیم میں احتیاط سے کام لیں جہاں مجالس منعقد کی جا رہی ہوں، وہاں ماسک اور سوشل ڈسٹنسنگ کو لازمی قرار دیا جائے۔
