حکام کے مطابق سرینگر انتظامیہ کی جانب سے ضلع میں اسکالر شپ درخواستیں آن لائن جمع کرنے کے لیے انٹرنیٹ کیفے کھولا گیا ہے، جس میں تقریباً 65 کمپوٹرز رکھے گئے۔
حکام نے بتایا کہ ان تمام کمپوٹرز میں انٹر نیٹ خدمات میں دستیاب رکھی گئیں ہیں اور طلبا آن لائن درخواستیں جمع کر رہے ہیں۔ حکام نے بتایا کہ تقریباً 7200 درخواستیں جمع کی گئی ہیں اور ان میں سرینگر کے علاوہ دیگر اضلاع کے طلبا بھی شامل ہیں۔
سرینگر انتطامیہ نے اسکول اور کالجز کی انتظامیہ سے رابطہ کیا تاکہ تمام غریب اور ضرورت مند طلباء یہ اسکالر شپ فارم جمع کر سکیں۔ ضلع ترقیاتی کمشنر سرینگر ڈاکٹر شاہد اقبال چودھری نے نینشل انفارمیٹکس سینٹر کو انٹرنیٹ کیفے کھولنے کی ہدایت دی تھی تاکہ طلبا پری میٹرک اور مابعد میٹرک اسکالر شپ کے لیے درخواستیں جمع کرسکیں۔
حکام نے بتایا کہ جموں و کشمیر انتظامیہ نے یہ معاملہ مرکزی حکومت کے سامنے اٹھایا تھا، جس کے بعد اسکالر شپ کے لیے آن لائن درخواستیں جمع کرنے کی آخری تاریخ میں 15 نومبر تک کی توسیع کرنے کا فیصلہ لیا گیا ہے۔
واضح رہے کہ 5 اگست کے روز مرکزی حکومت کی جانب سے دفعہ 370 کو ختم کرکے ریاست جموں و کشمیر کو دو حصوں میں تقسیم کرنے سے چند گھنٹے قبل ہی انٹرنیٹ معطل کر دیا گیا، جو کہ بدستور بند ہے۔
