پندرہ ہزار گلیوں کے لئے 15 جے سی بی، میئر کا انکشاف

مئیر جنید عظیم متو نے دعویٰ کیا کہ جب اُنہوں نے میئر کا عہدہ سنبھالا تب اُنہوں نے 25 سنو کلیئرنس مشینیں منگوائی تھی۔ تاہم آج تک بھی اس ضمن میں کچھ نہیں کیا گیا۔ وہ بھی تب جب فنڈز کی کوئی کمی نہیں ہے۔"

شہر سرینگر میں بھاری برفباری کے پیش نظر سڑکوں سے برف نہ ہٹائے جانے کی شکایتوں کے درمیان شہر کے مئیر جنید عظیم متو نے جمرات کو تسلیم کیا کہ "سرینگر میونسپلٹی کے پاس شہر کی 15000 گلیوں کو صاف کرنے کے لیے صرف 15 جے سی بی ہیں۔

سرینگر کے ایوان صحافت میں ایک پریس کانفرنس سے خطاب کرتے ہوئے متو کا کہنا تھا کہ "یہ بہت شرم کی بات ہے کہ میونسپلٹی کے ملازمین کو بیلچوں سے برف اٹھانا پڑ رہا ہے۔"

اُن کا مزید کہنا تھا کہ "شہر کی سڑکوں سے برف ہٹانے کی ذمہ داری ایس ایم سی کے علاوہ دو دیگر محکمہ پر عائد ہیں۔ میں لیفٹیننٹ گورنر منوج سنہا سے گزارش کرتا ہوں کی وہ برف باری سے پیدا شدہ صورتِحال کا مقابلہ کرنے میں برتی گئی لاپروائی کے حوالے سے جواب دہی طلب کرے۔ میں اُن کو خط لکھ کر سڑکوں سے برف ہٹانے میں ہوئی تاخیر کا تزکزہ کروں گا۔"اُنہوں نے دعویٰ کیا کہ جب اُنہوں نے مئیر کا عہدہ سنبھالا تب اُنہوں نے 25 سنو کلیئرنس مشینیں منگوائی تھی۔ تاہم آج تک بھی اس ضمن میں کچھ نہیں کیا گیا۔ وہ بھی تب جب فنڈز کی کوئی کمی نہیں ہے۔"اُن کا مزید کہنا تھا کہ "اگر وہ گاڑیاں وقت پر فراہم کی گئی ہوتی تو آج یہ صورتِحال ہمارے سامنے نہیں ہوتی۔ جب تک میں اس کُرسی پر رہوں گا میں اس کے لیے کوشش کرتا رہوں گا۔"